Tashkent Open XII. 17 yoshli Nig'matov shov-shuvli tarzda birinchi raqamli grossmeysterni engdi

Musobaqada 12 mamlakatdan kelgan shaxmatchilar g'oliblik yo'lida o'zaro raqobatlashishyapti. O'z tarixida o'n ikkinchi bor o'tkazilayotgan xalqaro turnirning sovrin jamg'armasi 20 000 AQSH dollarini tashkil qiladi. G'olib shaxmatchi 3 000 dollarga ega bo'ladi. 

Belaruslik xalqaro grossmeyster Kiril Stupak (2556) turnirning birinchi raqamli shaxmatchisi hisoblanadi. Kecha u beshinchi turda o'zi singari 4ta partiyaning barchasida g'alabaga erishgan yosh shaxmatchimiz Ortiq Nig'matovga qarshi dona surdi. 

Nig'matov kuchli raqibiga qarshi qora donalarda o'ynashiga qaramay, g'alaba qozonishga muvaffaq bo'ldi. Stupak o'tgan yilgi turnirda ikkinchi o'rinni egallagan edi. Bu o'ziga xos tarixiy g'alabadan so'ng Ortiq Nig'matov 5 ochko bilan yakka peshqadam bo'lib oldi. 

Xalqaro master Nodirbek Yoqubboev ham bu turda g'alabaga erishdi. Yosh shaxmatchimiz rossiyalik Ilya Dujakovdan ustun keldi. Yoqubboev ushbu g'alabasi evaziga turnir jadvalida 4,5 ochko bilan ikkinchi o'ringa ko'tarilib oldi. Yana bir hamyurtimiz Saidakbar Sayidaliev qora donalarda o'ynab, rossiyalik xalqaro grossmeyster Evgeniy Levin bilan murosaga keldi. 

Bugun oltinchi turda Nig'matov va Yoqubboev o'zaro munosabatlariga oydinlik kiritib olishadi. To'rt ochkoga ega bo'lib turgan Gulruhbegim Tohirjonova oq donalarda Kiril Stupakka qarshi dona suradi.