Tashkent Open XII. Nig'matov bir durang va mag'lubiyat qayd etdi

Musobaqada 12 mamlakatdan kelgan shaxmatchilar g'oliblik yo'lida o'zaro raqobatlashishyapti. O'z tarixida o'n ikkinchi bor o'tkazilayotgan xalqaro turnirning sovrin jamg'armasi 20 000 AQSH dollarini tashkil qiladi. G'olib shaxmatchi 3 000 dollarga ega bo'ladi. 

Belaruslik xalqaro grossmeyster Kiril Stupak (2556) turnirning birinchi raqamli shaxmatchisi hisoblanadi. Kecha u kunning ikkinchi yarmida o'tkazilgan ettinchi turda yosh hamyurtimiz Nodirbek Yoqubboevni mag'lubiyatga uchratdi va qo'shimcha ko'rsatkichlarga kshra 6 ochko bilan peshqadam bo'lib oldi.

Beshinchi turda aynan Stupakni taslim etib, birinchi o'ringa ko'tarilib olgan yosh shaxmatchimiz Ortiq Nig'matov esa ketma-ket ikkita turda ochko yo'qotdi va to'rtinchi o'ringa pastladi. U kecha qora donalar harakat qilib, rossiyalik xalqaro grossmeyster Vasiliy Papin bilan murosaga keldi. 

Yana bir hamyurtimiz Saidakbar Sayidaliev qora donalarda o'ynab, ispaniyalik xalqaro grossmeyster Oleg Korneev bilan durangga erishdi. Bugun sakkizinchi turda Nig'matov rossiyalik xalqaro grossmeyster Evgeniy Levinga qarshi oq donalarda harakat qiladi.