“Tashkent Open XII”. Nig'matov mag'lubiyatsiz odimlamoqda, 4-turda u grossmeysterni engdi

Musobaqada 12 mamlakatdan kelgan shaxmatchilar g'oliblik yo'lida o'zaro raqobatlashishyapti. O'z tarixida o'n ikkinchi bor o'tkazilayotgan xalqaro turnirning sovrin jamg'armasi 20 000 AQSH dollarini tashkil qiladi. G'olib shaxmatchi 3 000 dollarga ega bo'ladi. 

Belaruslik xalqaro grossmeyster Kiril Stupak (2556) turnirning birinchi raqamli shaxmatchisi hisoblanadi. Kecha to'rtinchi tur uchrashuvlari o'tkazildi. O'tgan yilgi turnirda ikkinchi o'rinni egallagan Stupak 4-turda o'zi singari 3 ochkoga ega bo'lib turgan hamyurtimiz Saidakbar Sayidalievni mag'lubiyatga uchratdi. 

Mag'lubiyatsiz odimlayotgan yosh shaxmatchimiz Ortiq Nig'matov ketma-ket to'rtinchi g'alabasiga erishdi. Bu safar u xalqaro grossmeyster musobaqaning to'rtinchi tartib raqamli shaxmatchisi Jahongir Vohidov (2546)dan ustun keldi. 

Yana bir yosh shaxmatchimiz Nikita Xoroshev oq donalarda hamyurtimiz Nodirbek Yoqubboev bilan murosaga keldi. Turnir jadvalida Stupak va Nig'matov 4tadan ochko jamg'arib, qo'shhokimlik qilishyapti. Bugun 5-turda aynan ikki peshqadam o'zaro to'qnash keladi. Hamyurtlarimizdan Nikita Xoroshev va Nodirbek Yoqubboevda 3,5tadan ochko bor.