“Tashkent Open XII”. To'rt nafar shaxmatchimiz etakchilar safida

Musobaqada 12 mamlakatdan kelgan shaxmatchilar g'oliblik yo'lida o'zaro raqobatlashishyapti. O'z tarixida o'n ikkinchi bor o'tkazilayotgan xalqaro turnirning sovrin jamg'armasi 20 000 AQSH dollarini tashkil qiladi. G'olib shaxmatchi 3 000 dollarga ega bo'ladi. 

Belaruslik xalqaro grossmeyster Kiril Stupak (2556) turnirning birinchi raqamli shaxmatchisi hisoblanadi. Kecha uchinchi tur uchrashuvlari o'tkazildi. Hozircha etti shaxmatchi yuz foizlik natijaga ega bo'lib turibdi. Ular orasida to'rt nafar hamyurtimiz ham bor. 

O'tgan yilgi turnirda ikkinchi o'rinni egallagan Stupak 3-turda tojikistonlik Muhammad Husanxo'jaevni mag'lubiyatga uchratdi. Yosh shaxmatchimiz Ortiq Nig'matov ketma-ket uchinchi g'alabasiga erishdi. Bu safar u ispaniyalik xalqaro grossmeyster musobaqaning ikkinchi tartib raqamli shaxmatchisi Oleg Korneev (2546)dan ustun keldi. 

Hamyurtlarimizdan Saidakbar Sayidaliev qora donalarda o'ynashiga qaramay, eronlik xalqaro grossmeyster Amirrizo Purramezanalini mag'lubiyatga uchratdi. Yana bir yosh shaxmatchimiz Nikita Xoroshev qora dolarada o'ynab, belaruslik xalqaro grossmeyster Vladimir Malaxatkoni dog'da qoldirdi. SHamsiddin va Jahongir Vohidovlar partiyasida durang natija qayd etildi. 

Hamyurtlarimizdan Ortiq Nig'matov qo'shimcha ko'rsatkichlarga ko'ra ikkinchi o'rinni egallab turibdi. Peshqadam Kiril Stupak hisobida ham 3 ochko bor. Nodirbek Yoqubboev, Saidakbar Sayidaliev va Nikita Xoroshev hozirgacha o'tkazilgan 3ta partiyada g'alaba qozonishgan. Bugun 4-turda Sayidaliev karvonboshi Stupakka qarshi oq donalarda harakat qiladi.