Tashkent Open. Yasmina 68 daqiqalik uchrashuv o'tkazdi

Sovrin jamg'armasi 250 000 AQSH dollarini tashkil qiluvchi ushbu musobaqaga Respublika olimpiya zaxiralari tennis maktabi kortlari mezbonlik qilmoqda. Turnirda yigirmadan ortiq davlatdan ko'zga ko'ringan tennis malikalari ishtirok etyapti. 

Asosiy to'r bahslarida hamyurtlarimizdan Sabina SHaripova (126) va Nigina Abduraimova (300) yurtimiz sport sharafini himoya qiladi. Tajribali Oqgul Omonmurodova va istedodli Yasmina Karimjonova esa bugun start oladigan saralash tunirida o'z imkoniyatlarini sinab ko'rishadi. 

Hozirgina dunyo reytingida 1236-pog'onadan joy olgan Yasmina saralashning yarim finalida jahonning 133-raketkasi rossiyalik Anastasiya Potapovaga qarshi kortga chiqdi. Bir soatu 8 daqiqa davom etgan bahsda Potapova 6:3, 6:1 hisobida zafar quchdi. 

Potapova saralashning birinchi raketkasi, Karimjonova esa imtiyozli yo'llanma asosida saralash bahslariga qo'yilgan edi. Mag'lubiyatga uchragan hamyurtimiz 1 reyting ochkosi va 750 dollarga ega bo'ldi. 

Birozdan so'ng Oqgul Omonmurodova saralashning yarim finalida gollandiyalik Bibiana Sxofsga qarshi kortga chiqadi. Oqgul WTA reytingida 628, Bibiana esa 184-o'rinni egallab turibdi.