Tata Steel Chess-2025. Abdusattorov amaldagi jahon chempioni bilan o'ynadi, u hamon peshqadam!

Bir kunlik dam olishdan so'ng musobaqada 6-tur uchrashuvlari o'tkazildi. Nufuzli turnirning "Masters" guruhida Nodirbek Abdusattorov, "CHellenjer"ida esa Nodirbek Yakubboev sovrinli o'rinlar uchun bahs olib boryapti.

Kecha 6-turda Nodirbek Abdusattorov (2768) bugungi kundagi asosiy raqiblaridan biri - amaldagi jahon chempioni, hindistonlik Gukesh Dommaradju (2777) bilan oq donalarda hisob-kitob qildi. Etti soatga yaqin davom etgan murosasiz bahsda durang natija qayd etildi. Uchrashuvda Nodirbek yaxshigina ustunlikka ham erishgandi, ammo uning g'alaba qozonishiga Gukesh yo'l qo'ymadi. O'zining bir yurishda yo'l qo'ygan xatosi ham uchrashuvning durang bilan yakunlanishiga sabab bo'ldi. 

SHunga qaramay, Abdusattorov musobaqada peshqadamligini saqlab qoldi. Ettinchi tur oldidan Nodirbek hisobida 4,5, Gukeshda 4 ochko bor. Hindistonlik Rameshbabu Prgananandha hisobida ham 4,5 ochko bo'lib, u qo'shimcha ko'rsatkichlarga ko'ra ikkinchi o'rindan joy olgan. 

"CHellenjer" guruhida qatnashayotgan Nodirbek Yakubboev (2659) esa 6-turda oq donalarda harakat qilganiga qaramay, germaniyalik Frederik Sven (2664)ni taslim eta olmadi. Uchrashuv durang bilan yakuniga etdi. Yakubboev 6 imkoniyatdan 3 ochko jamg'arib, musobaqa jadvalida 9-pog'onani band etgan. Uning raqibi Sven esa 3 ochko bilan qo'shimcha ko'rsatkichlar bo'yicha 8-o'rinni egallagan.