Tata Steel Chess-2025. Abdusattorov g'alaba evaziga peshqadam bo'lib oldi

Nufuzli turnirning "Masters" guruhida Nodirbek Abdusattorov, "CHellenjer" guruhida esa Nodirbek Yakubboev sovrinli o'rinlar uchun bahs olib boryapti. Kecha o'tkazilgan uchinchi tur bahsida Abdusattorov qatorasiga ikkinchi g'alabasini tantana qildi. U qora donalarda o'ynashiga qaramay, mezbon shaxmatchi Maks Varmerdamni mag'lubiyatga uchratdi. 

Quvonarlisi, Nodirbek 1 durang va 2 g'alaba bilan 2,5 ochko to'plagan holda qo'shimcha ko'rsatkichlarga ko'ra peshqadamlikni qo'lga oldi. Hamyurti Arjun Ergaisini taslim eta olgan hindistonlik Rameshbabu Pragnanandha ham o'z ochkolarini 2,5 taga etkazib oldi. Uchinchi turning markaziy partiyasida hindistonlik Gukesh Dommaradju amerikalik Fabiano Karuana bilan murosaga keldi. 

Afsuski, "CHellenjer" guruhida qatnashayotgan Nodirbek Yakubboev 3-turda mag'lubiyat alamini totib ko'rdi. U CHexiya sharafini himoya qilayotgan Nguen Tay Day Vanga yutqazib qo'ydi. Yakubboev 1,5 ochko bilan qo'shimcha ko'rsatkichlarga ko'ra 7-o'rinni egallab turibdi.