Tata Steel Chess. Abdusattorovda durang, Yakubboev 16 yoshli raqibiga yutqazdi FOTO + JADVAL

Kecha o'tkazilgan 7-turda "Masters" guruhida peshqadamlik qilib kelgan Nodirbek Abdusattorov qora donalarda Niderlandiyaning birinchi raqamli shaxmatchisi Anish Giri bilan murosaga keldi. Abdusattorovning ochko yo'qotishidan Gukesh Dommaradju unumli foydalanib qoldi. Amaldagi jahon chempioni oq donalarda hamyurti Pentala Harikrishnani mag'lubiyatga uchratdi. Yana bir hind grossmeysteri Rameshbabu Pragnanandha esa mezbon shaxmatchi Yorden Van Forest bilan durang o'ynadi. 

Gukesh kechagi g'alabasi evaziga ochkolarini 5 taga etkazib, qo'shimcha ko'rsatkichlarga ko'ra peshqadamlikni o'z qo'liga oldi. Dommaradju 6-turda Nodirbekka qarshi kechgan 7 soatlik partiyadan mag'lubiyatdan qochib ketgandi. Abdusattorov 5 ochko bilan ikkinchi o'rinni egallab turgan bo'lsa, 5 ochkoga ega Rameshbabu kuchli uchlikka yakun yasagan. Bu uch shaxmatchi hali mag'lubiyatga uchramagan. Xitoylik Vey I esa 7 ta partiyaning barchasida raqiblari bilan durang qayd etgan. 

"CHellenjer" guruhida qatnashayotgan Nodirbek Yakubboev (2659) esa 7-turda qora donalarda mag'lubiyat alamini totib ko'rdi. U turkiyalik 16 yashar iqtidor egasi Ediz Gurelga imkoniyatni boy berdi. Bu Yakubboevning musobaqadagi uchinchi mag'lubiyati bo'ldi. Nodirbek 7 imkoniyatdan 3 ochko jamg'arib, musobaqa jadvalida 10-pog'onani band etgan. CHexiyalik Van Nguen va niderlandiyalik Ervin L`ami 5 tadan ochko to'plab, "CHellenjer" guruhida qo'shhokimlik qilishyapti.