Tata Steel Chess. Abdusattorovda muhim g'alaba, Gukesh ham to'xtamayapti, Yakubboevda durang (FOTO+JADVAL)

Kecha o'tkazilgan 10-turda "Masters" guruhi peshqadamlari safida borayotgan Nodirbek Abdusattorov oq donalarda o'ynab, serbiyalik Aleksey Saranaga musobaqadagi ilk mag'lubiyatni taqdim etdi. Abdusattorov bu g'alaba evaziga 7 ochko bilan turnir jadvalida sof ikkinchi o'rinni o'ziniki qilib turibdi. 

Peshqadam Gukesh Dommaradju ham to'xtamayapti. Amaldagi jahon chempioni qora donalarda harakat qilganiga qaramay, niderlandiyalik Maks Varmerdamdan ustun keldi. Gukesh 7,5 ochko bilan yakka karvonboshi bo'lib turibdi. Yana bir hind grossmeysteri Rameshbabu Pragnanandha ham bu turda o'zi uchun muhim g'alabani qo'lga kiritdi. U sloveniyalik Vladimir Fedoseevdan ustun kelib, 6,5 ochko bilan kuchli uchlikka yakun yasagan. 

"Masters" guruhida mag'lubiyatga uchramagan uch nafar shaxmatchi qoldi - Gukesh Dommaradju, Nodirbek Abdusattorov va Vey I. Xitoylik grossmeysterning 1 g'alaba, 9 ta durang qayd etganiga etiborga molik holat. Gukesh hisobida 5 tadan g'alaba va durang bor. Abdusattorov esa 4 g'alaba va 6 durangga ega.

"CHellenjer" guruhida qatnashayotgan Nodirbek Yakubboev (2659) 10-turda oq donalarda niderlandiyalik Benjamin Bok bilan murosaga keldi. Yakubboev 3 g'alaba, 4 durang va 3 mag'lubiyat bilan 5 ochko jamg'argan holda turnir jadvalida 9-pog'onadan joy olgan. 

CHexiyalik Van Nguen 7,5 ochko bilan "CHellenjer" guruhida yakka karvonboshilik qilyapti. Niderlandiyalik Ervin L`ami 7 ochko to'plab, 2-o'rinni band etgan bo'lsa, ozarbayjonlik Aydin Suleymanli 6,5 ochko bilan qo'shimcha ko'rsatkichlarga ko'ra kuchli uchlikka yakun yasagan. Benjamin Bok hisobida ham 6,5 ochko bor.