Tata Steel Chess. Eh, Abdusattorov, Yakubboevda ketma-ket ikkinchi g'alaba

Kecha o'tkazilgan 12-turda "Masters" guruhi peshqadamlari safida borayotgan Nodirbek Abdusattorov qora donalarda o'ynab, asosiy raqiblaridan biri hindistonlik Arjun Ergaisiga qo'pol xato evaziga imkoniyatni boy berib qo'ydi. Bu turnirni omadsiz o'tkazayotgan Arjunning musobaqalagi ilk g'alabasi, aksincha, Nodirbekning birinchi mag'lubiyati edi. 

Kechagi mag'lubiyat sabab Nodirbek Abdusattorovning chempion bo'lish imkoniyatlari yo'qqa chiqdi. Boisi, birinchi va ikkinchi o'rinni egallab turgan hind grossmeysterlari o'z hisoblariga qimmatli ochkolarni yozib qo'yishdi. Rameshbabu Pragnanandha serbiyalik Aleksey Saranani mag'lubiyatga uchratgan bo'lsa, amaldagi jahon chempioni Gukesh Dommaradju qora donalarda niderlandiyalik Yorden Van Forest bilan murosaga keldi. Gukesh va Pragnanandha 8,5 ochkodan jamg'arishgan, Abdusattorov hisobida 7,5 ochko bor. 

"Masters" guruhida mag'lubiyatga uchramagan ikki shaxmatchi qoldi - Gukesh Dommaradju va Vey I. Xitoylik grossmeysterning 1 g'alaba, 11 ta durang qayd etgani etiborga molik holat. U 6,5 ochko bilan 5-o'rindan joy olga. Vladimir Fedoseev kechagi g'alabasi evaziga 7 ochko bilan 4-o'ringa ko'tarilib oldi. 

"CHellenjer" guruhida qatnashayotgan Nodirbek Yakubboev (2659) ketma-ket ikkinchi g'alabasini qo'lga kiritdi. U 12-turda oq donalarda niderlandiyalik Artur Pupersga chiroyli usulda mot qo'ydi. Ushbu g'alabadan keyin Yakubboev 7 ochko bilan 6-o'ringa ko'tarilib oldi. Beshinchi pog'onadagi germaniyalik Frederik Svan hisobida ham 7 ochko bor.

CHexiyalik Van Nguen 8,5 ochko bilan "CHellenjer" guruhida qo'shimcha ko'rsatkichlarga ko'ra karvonboshilik qilyapti. Ozarbayjonlik Aydin Suleymanli va niderlandiyalik Ervin L`ami hisobida ham 8,5 ochkodan bor, ular kuchli uchlikni yakunlab berishgan.