Tata Steel Chess India. Nodirbek Abdusattorov blic musobaqasining ilk kunini qanday o'tkazdi?

O'z tarixida oltinchi bor o'tkazilayotgan nufuzli musobaqaning mukofot jamg'armasi 41 500 AQSH dollarini tashkil etadi. Bugun turnirining blic bahslari start oldi va grossmeysterlar 9 ta turda hisob-kitob qilishdi. Nodirbek Abdusattorov rapid turnirida 5 ochko bilan 4-o'rinni band etgandi. 

Bugungi blic bahslari u uchun omadsiz boshlandi. Hamyurtimiz avvaliga Daniil Dubov (FIDE) bilan durang o'ynadi. Keyin esa ketma-ket 4 ta turda raqiblariga imkoniyatni boy berdi. Arjun Erigaisi, Vidit Gujrathi va Rameshbabu Praggnanandhaa (uchchalasi ham Hindiston) va Magnus Karlsen Nodirbekni taslim etdi. 

Keyin esa g'alabali seriya boshlandi. Abdusattorov Uesli So (AQSH), Sunildut Lina Narayanan (Hindiston) va Vinsent Keymer (Germaniya)dan ustun kelib, vaziyatni birmuncha ijobiy tomonga o'zgartirdi. Bugun uchun belgilangan so'nggi 9-turda esa Nihal Sarin (Hindiston) bilan murosaga keldi. 

SHu tariqa, Nodirbek Abdusattorov blic turnirining birinchi kungi bahslarini 4 ochko bilan yakunladi. U turnir jvadvalida 6-o'rinni egallab turibdi. Rapid turniri chempioni Magnus Karlsen 6,5 ochko bilan yakka peshqadam bo'lib oldi. Rameshbabu 6 ochko bilan ikkinchi o'rinni band etgan bo'lsa, Arjun Ergaisi 5,5 ochko bilan kuchli uchlikka yakun yasagan. 

Ertaga shaxmatchilar yana 9 ta turda o'zaro munosabatlariga oydinlik kiritib olishadi.