Tata Steel Chess yakunlandi. Nodirbek ketma-ket uchta g'alabaga erishdi. Yakuniy natijalar qanday bo'ldi? (FOTO+JADVAL)

Kecha so'nggi 13-turda "Masters" guruhida 3-o'rinni egallab turgan Nodirbek Abdusattorov oq donalarda hindistonlik Pentala Harikrishnaga qarshi bahs olib bordi va durang natija bilan kifoyalandi. Agar Nodirbek ushbu partiyada g'alaba qozonganida, chempionlik tay-brek uchrashuvlarida o'ynash imkoniyatini qo'lga kiritardi.   

Bunga amaldagi jahon chempioni Gukesh Dommaradjuning 13-turda oq donalarda o'ynashiga qaramay, vatandoshi Arjun Ergaisiga imkoniyatni boy bergani sabab bo'ldi. Ikkinchi o'rindagi Rameshbabu Pragnanandha ham so'nggi turda germaniyalik Vinsent Keymerga yutqazib qo'ydi. Nodirbek Abdusattorov esa asosiy raqiblari taqdim etgan bu imkoniyatdan unumli foydalana bilmadi. 

Agar Abdusattorov o'z partiyasida g'alaba qozonganida, 20 yoshgacha bo'lgan uch grossmeyster ishtirokidagi tay-brek partiyalariga guvoh bo'lar edik. Sakkiz yarimtadan ochko jamg'argan Gukesh va Rameshbabu o'rtasidagi tay-brekda biroz kutilmaganda Pragnanandha 2:1 hisobida g'alaba qozonib, "Tata Steel Chess-2025" chempioniga aylandi. Gukesh ikkinchi o'rinni band etgan bo'lsa, Nodirbek Abdusattorov 8 ochko bilan sovrinli uchinchi pog'onani egalladi. 

"CHellenjer" guruhida qatnashgan Nodirbek Yakubboev (2659) musobaqaning yakuniy qismini ko'tarinki ruhda o'tkazdi. U ketma-ket uchta partiyada g'alaba qozonishga muvaffaq bo'ldi. Agar musobaqa starti ham shunday bo'lganida, Yakubboev turnirni aniq sovrindorlar safida tugatardi. Nodirbek so'nggi 13-turda qora donalarda xitoylik ayol shaxmatchi Lu Miaoyini mag'lubiyatga uchratdi. Yakubboev 8 ochko bilan qo'shimcha ko'rsatkichlarga ko'ra 4-o'rinni egalladi. 

CHexiyalik Van Nguen va ozarbayjonlik Aydin Suleymanli yakunda 9,5 ochkodan jamg'arishdi. Tay-brekda Nguenning qo'li baland kelib, "CHellenjer" guruhi chempioniga aylandi. Yakubboevdan yarim ochko ko'p jamg'argan niderlandiyalik Ervin L`ami 8,5 ochko bilan kuchli uchlikni yakunlab berdi.