Tennis yangiliklari: Sultonov Almaty Open 250 saralashidan o'ta olmadi, Fomin esa Italiya CHellenjerining saralashida ishtirok etmoqda

Mamlakatimizning birinchi raketkasi Humoyun Sultonov kecha Qozog'istonning Olma-Ota shahrida o'tkazilayotgan Almaty Open 250 turniri saralashining ilk bosqichi doirasida kortga chiqdi. Unga Qozog'iston vakili Mixail Kukushkin raqiblik qildi.

1 soat, 24 daqiqa davom etgan bahsda Kukushkin 2:0 (6/4, 6/4) hisobida g'alaba qozondi. Taqqoslash uchun, Mixail ayni damda ATP reytingida 103, Sultonov esa 237-o'rinni egallab turibdi.

O'zbekistonning ikkinchi raqamli tennischisi Sergey Fomin esa shu kunlarda Italiyaning Olbio shahrida o'tkazilayotgan CHellenjer musobaqasi saralashida o'z omadini sinab ko'ryapti. U kecha ilk o'yinda italiyalik Federiko Salamon (ATP-2109) ustidan ortiqcha qiyinchiliksiz g'alaba qozondi. 1 soat, 7 daqiqa davom etgan bellashuvda Sergey 2:0 (6/4, 6/1) hisobida g'alabani o'ziniki qildi.

Fomin bugun kvalifikaciya finali doirasida sloveniyalik Milosh Karolga qarshi kortga chiqadi. 

Malumot uchun, ayni damda 23 yoshli Sergey Fomin ATP reytingida 534-o'rinni egallab turgan bo'lsa, 21 yoshli Milosh Karol 612-o'rinda qayd etilgan.