Tennischilarimiz Butunjahon Universiadada umumjamoa hisobida birinchi bo'lishdi

O'zbekistonning Universiada o'yinlari tarixidagi tennis bo'yicha ilk sovrinini qo'lga kiritgan vakillarimiz delegaciyamizga yana ikkita medalni tuhfa etishdi.

Yosh umidli tennischimiz Humoyun Sultonov erkaklar o'rtasidagi yakkalik bahslarida ham medalga sazovor bo'ldi.

Dastlabki o'yinlarda SHri-Lanka, Portugaliya va Kipr vakillarini hamda chorak finalda amerikalik Keegan James Smitni yirik hisobda mag'lub etgan yurtdoshimiz yarim finalda franciyalik Lukas Poullaindan 6/0, 6/3 hisobida ustun kelib, final yo'llanmasini qo'lga kiritgan edi.

Final uchrashuvida Xitoy Taypeyi vakili Tseng CHun-Xsinga qarshi kortga chiqqan Humoyun Sultonov birinchi setda tay-breykda g'alaba qozongan bo'lsa, ikkinchi va uchinchi setda raqibiga imkoniyatni boy berib qo'ydi hamda delegaciyamizning universiadadagi ettinchi sovrini hisoblangan kumush medalni qo'lga kiritdi.

Juftlik bahslarida oltin, yakkalikda kumush medalga sazovor bo'lgan tennischi yigitlarimiz umumjamoa hisobida ham birinchi o'rinni egallab, delegaciyamiz hisobiga navbatdagi oltin medalni qo'shib qo'yishdi.

Eslatib o'tamiz, 12 iyul kuni tennischilarimiz Humoyun Sultonov va Sanjar Fayziev juftligi musobaqaning oltin medalini yani O'zbekistonning Universiada o'yinlari tarixidagi tennis bo'yicha ilk medalini qo'lga kiritishgan edi.