Timur Kapadze: "Misrning kuchli tomonlari va imkoniyatlarini yaxshi bilamiz"

Tayyorgarlik haqida:

- Kecha Nant shahriga etib keldik, tayyorgarlikni davom ettirmoqdamiz. Oldimizda Misrga qarshi uchrashuv kutib turibdi. Eng asosiysi, hamma sog'-salomat, biroq bitta yo'qotishimiz bor. Himoyachimiz Ibrohimhalil oilaviy sabablarga ko'ra terma jamoa ixtiyorini tark etishga majbur bo'ldi. Lekin shunga qaramasdan reja bo'yicha mashg'ulotlarni davom ettiryapmiz va ertangi uchrashuvda g'alaba qozonishga harakat qilamiz. 

Ertangi raqibimiz Misr terma jamoasi haqida:

– Misrga kelsak, Afrikaning eng kuchli jamoalaridan biri. Ular bilan o'tgan yili Toshkentda o'ynaganmiz. Raqibimizning kuchli tomonlari va imkoniyatlarini yaxshi bilamiz. SHunga yarasha biz ham o'z rejamizga ko'ra tayyorgarlik ko'ramiz va g'alaba qozonish uchun bor imkoniyatimizni ishga solamiz. 

Ispaniyaga qarshi kechgan o'yin haqida:

– Birinchi uchrashuvdan keyin o'yinimizni tahlil qilib chiqdik va o'zimizga kerakli bo'lgan xulosalarni chiqardik. O'yin davomida bazi vaziyatlarda yaxshiroq o'ynadik, bazida esa kamchiliklar ham ko'zga tashlandi. Biroq, aytganimdek, xatolar ustida ishlayapmiz va hozirda bor etiborimiz ertangi o'yinga qaratilgan.

Jamoada qolgan barcha sog', muammo yo'q. Ibrohimhalil ketganidan so'ng zaxira futbolchilarimizdan birini qaydnomaga kiritishga harakat qilyapmiz. Bu borada tashkiliy qo'mitaga so'rov yubordik, hozircha javobni kutmoqdamiz.

Eslatib o'tamiz, O'zbekiston – Misr bellashuvi ertaga 20:00 da start oladi.