Tohirjonova jahon chempionati 1/4 finalining ikkinchi partiyasini o'tkazdi FOTO

Jahon chempionatining sovrin jamg'armasi 450 000 AQSH dollarini tashkil qiladi va g'olib shaxmatchi 60 000 dollarga ega bo'ladi. Ushbu jahon chempionatida yurtimiz sharafini yagona vakilamiz, ayollar o'rtasida xalqaro grossmeyster Gulruhbegim Tohirjonova muvaffaqiyatli himoya qilyapti. 

Hozirgina Gulruhbegim chorak final bosqichining ikkinchi uchrashuvida amaldagi jahon chempioni xitoylik Czyuy Venczyunga qarshi dona surdi. Hamyurtimiz oq donalarda harakat qildi. CHin yurti vakilasi birinchi raqam ostida tasniflangan bo'lib, kecha u qora donalarda durang bilan cheklangandi. Agar bugun Tohirjonova g'alaba qozonsa, yarim finalga yo'l olardi. 

Afsuski, tajriba muhim pallada o'z so'zini aytdi. Sakson birinchi yurishdan so'ng grossmeysterimiz o'z mag'lubiyatini tan oldi. SHunga qaramay, Gulruhbegim Tohirjonovaning jahon chempionatidagi ishtirokini muvaffaqiyatli deya baholash mumkin. Sababi, shu paytgacha o'zbekistonlik ayol shaxmatchilardan hech biri jahon chempionatining yarim final ostonasiga qadar etib kelmagan edi.