Tohirjonova Xitoydagi kuchlilar turnirida mag'lubiyatsiz dona suryapti FOTO

Umumiy sovrin jamg'armasi 119 000 AQSH dollarini tashkil etuvchi Belt & Road China 2019 musobaqasida sayyoramizning kuchli shaxmat qirolichalari o'z mahoratini namoyish etyapti. Ular orasida grossmeysterimiz Gulruhbegim Tohirjonova ham mag'lubiyatsiz odimlamoqda. 

Tohirjonova bugungacha o'tkazilgan uchta turda mag'lubiyatga uchramagan to'rt nafar shaxmatchidan biri bo'lib turibdi. Dastlabki ikki partiyada xitoylik raqibalarini mag'lub etgan Gulruhbegim bugun 3-turda durang o'ynadi. U qora donalarda harakat qilib, reytingda o'zidan yuqorida turgan xitoylik Ju Jiner bilan murosaga keldi.

Xitoydagi xalqaro turnirda rossiyaliklar Aleksandra Kostenyuk, Olga Girya, hindistonlik Xarika Dronovalli, gruziyaliklar Nino Batsiashvili, Nana Dzagnidze, bolgariyalik Antoaneta Stefanova, ukrainalik Anna Ushenina singari mashhur grossmeysterlar dona surishyapti. 

Bugun o'tkazilgan 3-tur uchrashuvlaridan so'ng musobaqa jadvalida bir yo'la to'rt nafar shaxmatchi Antoaneta Stefanova, xitoylik Ju Jiner, mo'g'ulistonlik Batxuyag Munguntuul hamda Gulruhbegim Tohirjonova 2,5 tadan ochko jamg'arib, peshqadamlik qilishyapti. Ertaga 4-turda hamyurtimiz birinchi taxtada oq donalarda Stefanovaga qarshi bahs olib boradi. 

Malumot uchun, musobaqa g'olibi 40 000 dollarni qo'lga kiritadi. Ikkinchi o'ringa 20 000, uchinchi o'ringa 15 000 AQSH dollari miqdoridagi mukofot puli kafolatlangan.