Tokio Olimpiadasiga yo'llanma olgan beshkurashchilarimizga pul mukofoti topshirildi

Tokio Olimpiadasiga yo'llanma beradigan mazkur musobaqada O'zbekiston terma jamoasi ham qatnashib, sportimiz tarixida ilk bor yozgi Olimpiya o'yinlariga yo'llanma oldi. Terma jamoamiz Alise Faxrutdinova hamda Aleksandr Savkinning ajoyib ishtiroki orqali Tokio Olimpidasiga bir emas ikkita licenziya qo'lga kiritdi. Qolaversa, sportchilarimiz miks estafetasida shohsupaning ikkinchi pog'onasiga ko'tarildilar.

Sportchilarimiz bugun tunda Toshkent xalqaro aeroportiga qaytib kelishdi. Qahramonlarimiz tantanali kutib olinganidan so'ng shu kunning o'zida ularga davlatimiz tomonidan ajratilgan pul mukofotlari topshirildi. Belgilab qo'yilganidek, Olimpiya o'yinlariga yo'llanma olgan sportchilarimiz Alise Faxrutdinova hamda Aleksandr Savkin 100 million so'mdan, ularning murabbiylari esa 50 million so'm miqdoridagi pul mukofotiga sazovor bo'ldilar.

Mazkur tadbirda O'zbekiston Respublikasi Prezidenti maslahatchisi Abdujabbor Abduvohidov, Milliy Olimpiya qo'mitasi prezidenti Rustam SHoabdurahmonov, Jismoniy tarbiya va sport vazirining birinchi o'rinbosari Oybek Kasimov, O'zbekiston zamonaviy beshkurash federaciyasi mutasaddilari, qolaversa, federaciyaga biriktirilgan masul tashkilotlar “Bekobod cement” AJ, va “Kvarc” AJ vakillari ham ishtirok etishdi. 

“Natijalarimizni mana shunday mukofotlar bilan taqdirlashayotgani uchun hukumatimizga tashakkur aytib qolaman. Federaciyamiz bizning bemalol shug'ullanishimiz uchun barcha sharoitlarni yaratib bermoqda. Nasib qilsa, Tokio Olimpiadasida bildirilgan bunday ishonchni oqlashga vada beramiz”, – dedi Alise Faxrutdinova.