To'lqin Qilichev BRIKS o'yinlarining bokschilarimiz uchun ahamiyati haqida gapirdi

Ushbu kompleks musobaqa dasturidan boks bahslari ham o'rin olgan bo'lib, unda O'zbekiston terma jamoasi ham to'liq tarkibda ishtirok etyapti. Terma jamoa bosh murabbiyi To'lqin Qilichev BRIKS o'yinlarining bokschilarimiz uchun ahamiyati haqida to'xtalib o'tdi. 

"Olimpiada oldidan o'tkazilayotgan ushbu kompleks musobaqaning ahamiyati katta. Asosiy jihatlaridan biri, uning formati aynan Olimpiadaga o'xshab ketadi. Bokschi uchun qancha ko'p musobaqa bo'lsa, shuncha yaxshi. Ayniqsa, og'ir vazn toifasi bokschilariga har doim janglar kam bo'lgan. Keyin bu vaznlarda ishtirokchilar ham kam bo'ladi. Tabiiyki, janglar soni ham shunga yarasha kam bo'ladi. SHuni inobatga olgan holda Parij-2024 Olimpiadasida qatnashadigan ikki bokschimiz To'rabek Habibullaev (-80 kg) va Bahodir Jalolov (+91 kg)ni BRIKS o'yinlariga qo'ydik. Ularga ko'proq jang amaliyoti kerak. Qolaversa, ikkinchi va uchinchi raqamli bokschilarimizni ham Qozonga olib kelganmiz. Ular uchun ham bu musobaqa katta tajriba maktabi vazifasini o'tab beradi", - dedi Qilichev.