Top-10`da birgina shaxmatchimiz qoldi (barcha malumotlar)

Bu yil o'z tarixida 18-marotaba tashkil etilayotgan, mukofot jamg'armasi 75 000 AQSH dollarini tashkil qiluvchi turnir shveycarcha tizimda 10 turdan iborat bo'ladi. Ishtirokchilar ikki guruhda sovrinli o'rinlar uchun bahs olib borishyapti. Asosiy hisoblangan A guruhida 1800 va undan yuqori reytingli shaxmatchilar jam bo'lgan. V guruhida esa reytingi 1999 va undan past bo'lgan ishtirokchilar dona surmoqda. 

Kuchlilar jam bo'lgan A guruhida hindistonlik xalqaro grossmeyster Nihal Sarin (2687) birinchi raqam ostida saralangan. U kecha 6-turda qora donalarda o'ynashiga qaramay, grossmeysterimiz Abdumalik Abdusalimov (2525)ni mag'lubiyatga uchrata oldi. Ushbu mag'lubiyat shu kungacha shaxmatchilarimiz orasida eng yaxshi natija qayd etib kelayotgan Abdusalimov uchun birinchisi bo'ldi. 

Ikkinchi raqamli shaxmatchi sifatida tasniflangan yosh grossmeysterimiz SHamsiddin Vohidov (2670) nihoyat g'alaba qozondi. U oq donalarda qirg'izistonlik Asilbek Abdijapar (2361)dan ustun keldi va o'z ochkolarini 4 taga etkazib oldi. Yosh shaxmatchimiz Humoyun Begmuratov (2430) 6-turda qora donalarda harakat qilganimga qaramay, reytingda o'zlaridan yuqorida borayotgan hindistonlik grossmeyster Aditya Mittal (2550) bilan durang o'ynadi. Tur oldidan 4 ochkoga ega bo'lib turgan hamyurtimiz Muhammadzohid Suyarov (2474) qora donalarda hindistonlik grossmeyster Leon Mendonka (2643)ga yutqazdi. 

Bu turda o'ziga xos o'zbek derbisida Almas Rahmatullaev Saidakbar Saydaliev bilan murosaga keldi. Grossmeysterimiz Ortiq Nig'matov (2501) rossiyalik shaxmatchi bilan durang qayd etgan bo'lsa, Muhiddin Madaminov (2550) tojikistonlik Muhammad Husenxodjaevga yutqazib qo'ydi.   

Oltinchi turdan so'ng vengriyalik Sanan Syugirov 5,5 ochko bilan yakka peshqadam bo'lib oldi. Kecha u eng yaqin taqibchisi bo'lib turgan singapurlik Tin Cingyaoni mag'lubiyatga uchratdi. Turkmanistonlik Saparmirat Atabaev 5 ochko bilan qo'shimcha ko'rsatkichlarga ko'ra 2-o'ringa ko'tarilib oldi. To'rt nafar hind shaxmatchilari hisobida ham 5 tadan ochko bor. Hamyurtlarimiz orasida eng yaxshi ko'rsatkich Humoyun Begmuratovda, u 4,5 ochko bilan 8-pog'onadan joy olgan. 

Bugun 7-turda peshqadam Sanan Syugirov qora donalarda Nihal Saringa qarshi o'ynaydi. Humoyun Begmuratov oq donalarda FIDE bayrog'i ostida ishtirok etayotgan rossiyalik grossmeyster Arseniy Nesterovga qarshi bahs olib boradi. Ochkolarini 4 taga etkazib olgan SHamsiddin Vohidov eronlik Radin Yadegar bilan hisob-kitob qiladi.