Toshkentda 80 000 dollar mukofot puliga ega Prezident kubogi boshlandi

Mukofot jamg'armasi 80 ming AQSH dollarini tashkil etuvchi mazkur musobaqada dunyoning turli mamlakatlaridan kelgan grossmeysterlar bosh sovrin uchun bahslarga kirishdi. Hindistonlik Nihal Sarin (2701) turnirda birinchi raqam ostida saralangan bo'lib, u 1-turda oq donalarda germaniyalik Frederik Svenni mag'lubiyatga uchratdi. 

Musobaqada beshinchi raqam ostida saralangan hamyurtimiz SHamsiddin Vohidov (2641) ham o'z ishtirokini g'alaba bilan boshlab oldi. Grossmeysterimiz franciyalik Maksim Lagarde (2608 )ni oq donalarda o'ynab taslim etdi. Yana bir yosh grossmeysterimiz Muhiddin Madaminov (2552) ham ilk turda zafar quchdi. U blic bo'yicha uch karra jahon chempioni, turnirning uchinchi saralangan shaxmatchisi, rossiyalik Aleksandr Grishukdan ustun keldi. Grossmeysterimiz Abdimalik Abdisalimov (2561) esa ikkinchi saralangan ishtirokchi, armanistonlik SHant Sargsyan (2665)ga imkoniyatni boy berdi. 

Birozdan so'ng, aniqrog'i soat 15:00da 2-tur uchrashuvlari boshlanadi. SHamsiddin Vohidov qora donalarda ukrainalik grossmeyster Yuriy Kuzubovga qarshi bahs olib boradi. Muhiddin Madaminov ham qora donalarda o'ynaydi, uning raqibi SHant Sargsyan bo'ladi. Abdimalik Abdisalimov oq donalarda Frederik Sven bilan hisob-kitob qiladi.