Toshkentda "Georgiy Agzamov xotira turniri" yakunlandi, B guruhidagi shohsupani to'laligicha shaxmatchilarimiz egallashdi

Mukofot jamg'armasi 25 000 AQSH dollarini tashkil qilgan musobaqada 18 davlatdan ikki yuz besh nafarga yaqin shaxmatchi ikki guruhga bo'lingan holda sovrinli o'rinlar uchun bahs olib bordi. Ishtirokchilar orasida 15 grossmeyster (GM), 2 ayol grossmeyster (WGM), 13 nafar xalqaro usta (IM), 4 ayol xalqaro usta (WIM)ning borligi musobaqaning murosasiz kechishini taminladi.

"A" guruhida 10 ta tur yakunlariga ko'ra indoneziyalik grossmeyster Susanto Megaranto (2504) 8 ochko bilan musobaqa chempioniga aylandi. Qirg'izistonlik 17 yoshli Eldiar Orozbaev (2325) 7,5 ochko bilan ikkinchi o'rinni egalladi. Besh nafar shaxmatchi 7 ochkodan jamg'ardi. Qo'shimcha ko'rsatkichlarga ko'ra eronlik Bardiya Daneshvar (2597) uchinchi o'rinni band etdi.

O'zbekistonlik shaxmatchilardan eng yaxshi natijani Muhammadzohid Suyarov (2407) qayd etdi. U 6,5 ochko to'plaganlar orasida eng yaxshi natija bilan 8-o'rinni egalladi. Hamyurtlarimizdan Muhiddin Madaminov (2512), Humoyun Begmuratov (2385) va Abdumalik Abdusalimov (2503) ham 6,5 ochkodan jamg'arishdi. Faqat qo'shimcha ko'rsatkichlarga ko'ra ular mos ravishda 12, 13 va 18-o'rinlar bilan kifoyalanishdi

Etiborlisi, "V" guruhidagi sovrinli uchlikni o'zbekistonlik shaxmatchilar tashkil etib berishdi. G'oliblik 8,5 ochko to'plagan Hadiyatullo Muhammedovga nasib etdi. Aynan shuncha ochko jamg'argan Mehriddin Yo'ldoshev ikkinchi o'rinni egallagan bo'lsa, kuchli uchlikka 8 ochko bilan Muhammadiso Ubaydullaev yakun yasab berdi. Dastlabki to'qqiz o'rinni o'zbekistonlik shaxmatchilar band etishgani quvonarli hol.