Toshkentda koreyalik mutaxassislar ishtirokida seminar o'tkazildi

Respublika sport tibbiyoti ilmiy-amaliy markazi tashabbusi bilan Milliy olimpiya qo'mitasida janubiy koreyalik professorlar ishtirokida sport tibbiyoti bo'yicha amaliy seminar tashkil etildi. Janubiy Koreyaning «CHong Yon» klinikasi  ishtirokidagi ushbu tadbirda Respublika sport tibbiyoti ilmiy-amaliy markazi mutaxassislari bilan bir qatorda Toshkent tibbiyot akademiyasi professor-o'qituvchilari, magistr va klinik ordinatorlari hamda talabalari ham qatnashdilar. 

— Sportni rivojlantirish yo'lida sport tibbiyotining ahamiyati beqiyos, - deydi seminarning ochilish marosimida ishtirok etgan tibbiyot markazi direktori, tibbiyot fanlari doktori, professor Abdushukur Sodiqov. — Sportchining musobaqaga jismoniy tomonlama tayyor bo'lishi va tiklanishida sport tibbiyoti muhim o'rin tutadi. SHu sababdan, O'zbekistonda ham mazkur yo'nalishni rivojlantirish bo'yicha talaygina ishlar amalga oshirilmoqda. Ushbu seminar ham bu yo'lda navbatdagi qadam bo'ldi, deyishimiz mumkin. 

Seminarda nutq so'zlagan Janubiy Koreyadan tashrif buyurgan professor Pak Jon Sin sport tibbiyoti sohasidagi yangi yutuqlar, ularni amalga oshirish mexanizmlari, kasalliklarni xalq tabobati yordamida davolash haqida mahorat darslari o'tib, maruza qildi. Buni amaliyotda ham ko'rsatib berishdi. Bundan tashqari, seminar qatnashchilari o'zlarini qiziqtirgan savollarga javob olishdi. 

Albatta, sportchining muvaffaqiyatga erishishida uning sog'lomligi, musobaqaga tayyorgarlik ko'rishi, mashg'ulotlardan so'ng tiklanish jarayonlarini to'g'ri tashkil qilish katta ahamiyatga ega. Mamlakatimizda bunday amaliy seminarlar tashkil etilishi esa sport rivojiga o'z hissasini qo'shishi, shubhasiz.