Toshkentda mukofot jamg'armasi 12 000 evrolik shaxmat festivali o'tkaziladi

Unda Markaziy Osiyo davlatlari, jumladan Qozog'iston, Qirg'iziston, Tojikiston, Turkmaniston, Afg'oniston hamda O'zbekistondan eng kuchli shaxmatchilar g'oliblik uchun dona surishadi.

O'zbekiston shaxmat federaciyasi matbuot xizmatining xabar berishicha, mukofot jamg'armasi 12 000 evro bo'lgan ushbu musobaqa shaxmatchilar uchun reytingli ekani bilan ham ahamiyatlidir. Musobaqa Nizomiga ko'ra o'g'il bolalar o'rtasida chempionlikni qo'lga kiritadigan shaxmatchiga 3 000 evro, qizlar o'rtasidagi bahslarning mutlaq chempioniga esa 1 500 evro miqdorida mukofot puli belgilangan.

FIDE, RosATOM hamda O'zbekiston shaxmat federaciyasi hamkorligida o'tkazilayotgan ushbu musobaqada 20 yoshgacha bo'lgan hamda reytingi o'g'il bolalar uchun 1 800 va qizlar uchun 1 600 baldan kam bo'lmagan shaxmatchilar qatnashish uchun ariza berishlari mumkin.

To'qqiz turdan iborat bahslarda har bir ishtirokchiga partiya oxirigacha 90 daqiqa vaqt beriladi.