07 sen 17:40
Yangiliklar
O'q otish
Toshkentda XOQning “Olimpiya birdamligi” dasturi asosida o'q otish sporti murabbiylari uchun o'quv-texnik seminari ish boshladi
O'zbekiston Milliy olimpiya qo'mitasi (MOQ) O'zbekiston o'q otish federaciyasi bilan hamkorlikda sportning ushbu turi murabbiylari uchun o'quv-texnik seminarini boshladi.
Mazkur seminar Xalqaro olimpiya qo'mitasi (XOQ)ning “Olimpiya birdamligi” dasturi asosida o'tkazilmoqda.
Poytaxtimizdagi “Grand
Atlas” mehmonxonasida tashkil etilayotgan seminarni olib borish uchun
Hindiston va Norvegiyalik xalqaro ekspertlar Sonal Ramendra va Leyf
Steynar Rollandlar taklif etilishgan.
Seminar dasturi
zamonaviy bosqichda yuqori toifadagi sportchilarni tayyorlash masalasida
nazariy mashg'ulotlar bilan birgalikda, murabbiylarning professional
malakasini xalqaro talablar darajasida oshirish masalalarini ham qamrab
oladi. O'quv-texnik kurslari davomida murabbiylar shuningdek, merganlar
bilan ishlash masalasida yangi ko'nikmalarga ega bo'lish, nazariy bilim va
darajalarini oshirish imkoniga ega bo'lishadi.
Respublikamizning turli
hududlari va poytaxtimiz Toshkentdan 40 nafar murabbiy mazkur seminarda
ishtirok etmoqda. Seminar qatnashchilarining har biri metodik qo'llanmalar
bilan taminlanishdi.
Sir emaski, o'q otish
sporti O'zbekistonda ommaviylashib kelayotgan sport turlaridan hisoblanadi.
Yurtimiz Mustaqillikka erishgach, so'nggi 26 yil davomida sportchilarimiz
bir qator yirik xalqaro turnirlar va nufuzli musobaqalarda ijobiy
natijalarga erishib kelmoqdalar. Seminar davomida orttirilgan tajriba va
ko'nikmalar o'q otish sportining mamlakatimizda yanada rivojlanishi va tashkil
etiladigan musobaqalarning saviyasi oshishiga turtki bo'ladi.
Seminarning tantanali
yopilish marosimi 2017 yilning 11 sentyabr kuni O'zbekiston Milliy olimpiya
qo'mitasi binosida bo'lib o'tadi. Unda seminarning faol tinglovchilariga
Xalqaro olimpiya qo'mitasi Prezidenti Tomas Baxning imzosi bilan maxsus
Sertifikatlar topshiriladi. Takidlash lozimki, mazkur seminarning
o'tkazilishi mamlakatimizda o'q otish sportining jadal suratlar bilan
rivojlanishida muhim ahamiyat kasb etadi.
Malumot uchun, Milliy
olimpiya qo'mitasi 1997 yildan beri sport kadrlari malakasini oshirish
yo'lida shu kabi seminarlarni o'tkazib kelmoqda. Ortda qolgan davr
mobaynida MOQ Xalqaro olimpiya qo'mitasi yordamida badiiy va sport
gimnastikasi, qilichbozlik, basketbol, sport kurashlari, taekvondo, dzyudo,
engil atletika, suzish, voleybol, ot sporti, figurali uchish va boshqa
sport turlari mutaxassislari uchun 40 dan ziyod o'quv kurslari tashkil etdi.
Havola :
Manba : olympic.uz
Fikrlar