Toshkentdagi xalqaro turnirda ochko yo'qotmagan shaxmatchi qolmadi. Uch shaxmatchimiz Top-5`da! (barcha natijalar)

Bu yil o'z tarixida 18-marotaba tashkil etilayotgan, mukofot jamg'armasi 75 000 AQSH dollarini tashkil qiluvchi turnir shveycarcha tizimda 10 turdan iborat bo'ladi. Ishtirokchilar ikki guruhda sovrinli o'rinlar uchun bahs olib borishyapti. Asosiy hisoblangan A guruhida 1800 va undan yuqori reytingli shaxmatchilar jam bo'lgan. V guruhida esa reytingi 1999 va undan past bo'lgan ishtirokchilar dona surmoqda. 

Kuchlilar jam bo'lgan A guruhida hindistonlik xalqaro grossmeyster Nihal Sarin (2687) birinchi raqam ostida saralangan. U 4-turda qora donalarda hamyurti Saha Nilash (2460) bilan durangga imzo chekdi. Ikkinchi raqamli shaxmatchi sifatida tasniflangan yosh grossmeysterimiz SHamsiddin Vohidov (2670) oq donalarda o'ynaganiga qaramay, reytingda o'zidan ancha quyida borayotgan rossiyalik Dmitriy Rostovcev (2292)ni bilan murosaga keldi

Uchinchi turdan keyin ikki shaxmatchimiz Abdumalik Abdusalimov (2525) va Humoyun Begmuratov (2430) yuz foizlik natija bilan peshqadamlar safida borishayotgandi. Ularning har ikkisi ham 4-turda qora donalarda harakat qilganlariga qaramay, reytingda o'zlaridan yuqorida turgan taniqli grossmeysterlar bilan durang qayd eta olishdi. Abdusalimov vengriyalik Sanan Syugirov (2631), Begmuratov serbiyalik Aleksandar Indjich (2651) bilan durang o'ynadi.   

Almas Rahmatullaev bu turda yana bir hamyurtimiz Javohir Bozorovni enga olmadi. Sayidakbar Saydaliev esa qozog'istonlik Imangali Ahilbaydan ustun keldi va ochkolarini 3,5 taga etkazib oldi. Muhammadzohid Suyarov qora donalarda tojikistonlik Jaloliddin Ilhomini mag'lub etdi. 

Grossmeysterimiz Muhiddin Madaminov (2550) kutilmaganda yana bir shaxmatchimiz Jo'rabek Ibodullaev (1936) bilan durang o'ynadi. Grossmeysterlarimizdan yana biri Ortiq Nig'matov (2501) kutilmaganda tojikistonlik Muhammad Husenxo'jaev (2350)ga yutqazib qo'ydi.  

To'rtinchi turdan so'ng ochko yo'qotmagan shaxmatchi qolmadi. Bir yo'la sakkiz nafar ishtirokchi 3,5 tadan ochko jamg'arib, turnir jadvalida dastlabki sakkiz o'rinni egallab turibdi. Qo'shimcha ko'rsatkichlarga ko'ra Sanan Syugirov peshqadamlik qilyapti. Singapurlik grossmeyster Tin Cingyao ikkinchi, hamyurtimiz Saidakbar Saydaliev uchinchi o'rinni band etgan. Humoyun Begmuratov to'rtinchi, Abdumalik Abdusalimov beshinchi pog'onadan joy olgan.