Turkiya yoshlar va sport ishlari vaziri Mexmet Kasapoglu O'zbekiston xalqini shaxmatdagi tarixiy g'alaba bilan tabrikladi

Mazkur musobaqada O'zbekiston sharafini 265 nafar sportchimiz himoya qilishyapti.

Yurtimiz atletlarini qo'llab-quvvatlash maqsadida O'zbekiston Respublikasi sportni rivojlantirish vaziri Adxam Ikramov ham ayni vaqtda Konya shahrida bo'lib turibdi.

SHuningdek, vazir tashrifining kun tartibidan xorijlik sport mutasaddilari bilan uchrashuvlar o'tkazish va hamkorlik masalalarini muhokama qilish ham o'rin olgan.

Xususan, bugun Konyadagi “Grand Millenium” mehmonxonasida Sportni rivojlantirish vaziri Adxam Ikramov hamda Turkiya yoshlar va sport ishlari vaziri Mexmet Kasapoglu o'rtasida uchrashuv bo'lib o'tdi.

Uchrashuv davomida ikki mamlakat o'rtasida sport sohasida hamkorlik aloqalarini mustahkamlash, futbol, dzyudo, boks, og'ir atletika kabi sport turlarida keng qamrovli hamkorlikni yo'lga qo'yish masalalari muhokama qilindi.


SHu o'rinda Adxam Ikramov Turkiya yoshlar va sport ishlari vaziri Mexmet Kasapoglu hamda V Islom birdamlik o'yinlari tashkilotchilariga sportchilar uchun yaratilgan sharoitlar va yuqori darajada tashkil etilayotgan tadbirlar uchun o'z minnatdorligini bildirdi.

Qolaversa, A.Ikramov turkiyalik hamkasbiga O'zbekistonda tashkil etilayotgan nufuzli xalqaro musobaqalar, jumladan shu yil o'tkaziladigan dzyudo bo'yicha kattalar o'rtasida jahon chempionati, boks bo'yicha 2023 yili bo'ladigan jahon chempionati, yaqinda mezbonlik huquqi qo'lga kiritilgan shaxmat bo'yicha 46-Butunjahon olimpiadasi haqida to'xtalib, ushbu tadbirlarda Turkiya sport delegaciyasini ham faol ishtirok etishga chaqirdi.

Uchrashuv qizg'in davom etayotgan bir vaqtda Adxam Ikramovga o'zbekistonlik yoshlar 44-Butunjahon shaxmat olimpiadasida g'olib bo'lishgani to'g'risidagi axborot etkazildi va bu xushxabardan mamnun bo'lgan Turkiya yoshlar va sport ishlari vaziri Mexmet Kasapoglu O'zbekiston xalqi va olimpiada g'oliblarini tarixiy g'alaba bilan muborakbod etib, shaxmatchi yoshlarga kelgusi musobaqalarda ulkan zafarlar tiladi.

Uchrashuv yakunida tomonlar o'zaro sovg'alar almashdi.