U-23 Jahon chempionati. Alisher G'aniev yarim finalda, qolganlarda esa mag'lubiyat

Musobaqaning ilk kunida yunon-rum kurashi bellashuvlari o'tkazilmoqda.

Kun davomida uch nafar hamyurtimiz gilamga chiqdi.

Dastlab, 72 kg vaznli Abror Atabaev Puerto-Riko vakili Brendon Navarroni 8:0, ozarbayjonlik Ruslan Nurullaevni 3:2 hisobida taslim etdi. CHorak final bosqichida esa hamyurtimiz shveciyalik Jeorjis Barbanosga imkoniyatni boy berib qo'ydi — 2:3.

Samandar Bobonazarov (82 kg) esa saralash bosqichida Vengriya terma jamoasi azosi Miklos Kiralxazini 8:0 hisobida dog'da qoldirdi. Afsuski, hamyurtimiz nimchorak final bosqichida Germaniya sharafini himoya qiluvchi Deni Nakaevga 4:1 hisobida mag'lub bo'ldi.

Quvonarlisi, 60 kg vazn toifasida terma jamoamiz azosi Alisher G'aniev dastlab, germaniyalik Georgios Skarpelloni 9:0, keyinroq ruminiyalik Denis Mixaini 8:0, chorak final bosqichqida esa Ukraina vakili Bogdan Xrishinni 11:2 hisobida taslim etdi.

Endilikda hamyurtimiz yarim final doirasida ozarbayjonlik Nihad Guluxadega qarshi gilamga chiqadi. Bahs 21:00 da boshlanadi.