Uch nafar yosh grossmeysterimiz Abu-Dabida mahoratini namoyish etyapti

26th Abu Dhabi International Chess Festival musobaqasida 27 davlatdan 150 nafar shaxmatchi g'oliblik yo'lida dona suryapti. Ulardan 55 (34 xalqaro grossmeyster) nafarining grossmeyster ekanligi ushbu turnirning nufuzidan darak bermoqda. Ukrainalik xalqaro grossmeyster Yuriy Krivoruchko (2686) musobaqaning reyting-favoriti hisoblanadi. 

Abu-Dabidagi shaxmat festivalida yurtimiz sharafini uch nafar yosh grossmeysterimiz Nodirbek Abdusattorov, Nodirbek Yoqubboev, Javohir Sindarov hamda yana bir shaxmatchimiz, sport sharhlovchisi Akrom Toshxo'jaev himoya qilmoqda. 

Beshinchi turda Abdusattorov (2594) oq donalarda harakat qilishiga qaramay, reytingda o'zidan yuqorida turgan eronlik xalqaro grossmeyster Parham Maqsudlu (2656)ga yutqazib qo'ydi. Uchrashuv oldidan har ikki shaxmatchi ham 3,5 tadan ochkoga ega bo'lib turishgandi.

Nodirbek Yoqubboev (2574) esa aksincha qora donalarda o'ynashiga qaramay, armanistonlik xalqaro grossmeyster Vladimir Akopyan (2650)ni taslim etishning uddasidan chiqdi. Bu ikki grossmeyster 3 ochkodan jamg'arishgan edi. 

Javohir Sindaro (2507) bu turda oq donalarda hindistonlik grossmeyster Suri Vaybxav (2591) bilan murosaga keldi. Akrom Toshxo'jaev (2123) xitoylik Ni SHi Gun bilan durang o'ynadi. 

Bugun o'tkaziladigan 6-tur oldidan gruziyalik xalqaro grossmeyster Baadur Jobava (2584) yuz foizlik ko'rsatkich, yani 5 ochko bilan yakka peshqadam bo'lib turibdi. Eronlik Parham Maqsudlu 4,5 ochko bilan ikkinchi, hamyurtimiz Nodirbek Yoqubboev qo'shimcha ko'rsatkichlarga ko'ra 4 ochko bilan uchinchi o'rinni band etgan.