Uch sambochimiz Jahon kubogining finalida, yana uch nafarida bronza!

Sambo sport turi asoschilaridan biri A.Xarlampiev xotirasiga bag'ishlab o'tkazilayotgan ushbu musobaqada o'zbekistonlik sambochilar ham yurtimiz sharafini himoya qilishyapti. Hozirgacha o'tkazilgan bahslarda uch nafar sambochimiz final yo'llanmasini qo'lga kiritdi. 

Jangovor sambo bo'yicha o'tkazilayotgan musobaqaning -82 vazn toifasidagi bahslarida ishtirok etayotgan Bekzod Nurmatov yarim finalda irlandiyalik raqibini mag'lubiyatga uchratib, final yo'llanmasini qo'lga kiritdi. -68 kg vazndagi sambochimiz Zafar Allabergenov Janubiy Koreya va Qirg'iziston davlati vakillarini engib, finalga chiqdi. 

-57 kg vazn toifasida yurtimiz sharafini himoya qilayotgan Sirojiddin Anorqulov ham oltin medal uchun bahs olib boradi. U yarim finalda turkmanistonlik raqibidan ustun keldi. Bu uch sambochimiz birozdan so'ng oltin medal uchun gilamga chiqishadi. 

Sambo musobaqasining yarim finalida mag'lubiyatga uchragan -82 kg vazndagi Ulug'bek Rahmonov, -68 kilogramdagi Timur Xudoyqulov hamda qizlar o'rtasidagi -52 kg vazndagi vakilamiz Zuhraxon Mamurjonova bronza medaliga sazovor bo'lishdi.