UFC chempioni Iliya Topuriyaning yangi vaznga o'tayotgani tasdiqlandi

Bu malumot rasman o'z tasdig'ini topdi. Ispaniya sharafini himoya qilayotgan asli gruziyalik aralash yakkakurash ustasi yarimengil vazn chempionligini vakant qoldirib, engil vaznda faoliyatini davom ettiradi. Bu vaznda amaldagi UFC chempioni Islam Maxachev hisoblanadi.

"Iliya har bir jangi oldidan ko'p miqdorda vazn tashlashiga to'g'ri keladi. Bu ishni har safar takrorlash juda og'ir va mushkul jarayon. U ortiq bunday qilmoqchi emas. Iliya bu og'ir jarayon davom etishini xohlamaydi. Topuriyaning vazni 85 kilogrammgacha ko'tariladi. Jang payti esa 66 kg bo'lishi shart. Yigirma kilogramm vazn tashlash organizmni qiynab qo'yadi. Aslida ham shunday bo'lyapti. Iliya tez kunda chempionlik kamarini vakant qoldiradi", deya Submission Radio kanaliga intervyu berdi Iliya Topuriyaning murabbiyi Xorxe Kliment.

SHuningdek, Kliment shogirdining may oyida engil vaznda sobiq UFC chempioni CHarlz Oliveyraga qarshi oktagonga chiqmoqchi bo'layotganini ham qo'shimcha qildi. Braziliyalik bu jangga rozi bo'lmasa, u holda amerikalik Dastin Pore varianti ko'rib chiqiladi. Porening o'zi ham Topuriya bilan jang o'tkazishga qarshi emasligini aytgan.