UFC Fight Night 249 turnirining barcha natijalari bitta xabarda

UFC Fight Night 249 turnirining markaziy jangi ayollar minimal vazn toifasida o'tkazilib, revansh maqomidagi bahsda Makkenzi Dern besh yil avvalgi mag'lubiyat uchun Amanda Ribasdan munosib tarzda qasos oldi. Referi Mark Smit uchinchi raund yakunlanishiga uch soniya qolgan bir paytda jangni to'xtatdi. Amerikalik aralash yakkakurash ustasi og'ritish usuli bilan braziliyalik raqibasini taslim bo'lishga majbur etdi. 

Oqshomning ko-meynivent jangida argentinalik yarimo'rta vazn toifasi vakili Santyago Ponzinibbio uchinchi raundda Gayanalik Karlston Xarrisni texnik nokautga uchratdi. Bu bilan u ikki mag'lubiyatli seriyasiga barham berdi. 

Asosiy kard doirasidagi jangda rossiyalik o'rta vazn toifasi vakili Roman Kopilov jang yakunlanishiga ikki soniya qolgan bir paytda amerikalik Kris Kyortisni oyoqda boshga bergan zarbasi bilan nokautga uchratdi. 

Tojikiston burguti Nurullo Aliev 2025 yilni g'alaba bilan boshlab oldi. U Jo Soleckiga qarshi kechgan uch raundlik to'liq jangda ochkolar hisobiga ko'ra g'alaba qozondi.

Qolgan natijalarga to'xtaladigan bo'lsak, rossiyalik aralash yakkakurash ustalari Magomed Gadjiyasulov va Viktoriya Dudakova bugungi turnirda mag'lubiyat alamini totib ko'rishdi. Yarimog'ir vazn toifasi vakili bo'lgan Magomed braziliyalik Bruno Lopesga imkoniyatni boy berish asnosida faoliyatidagi ilk mag'lubiyatini qabul qilib oldi. Birinchi engil vazn toifasida janglarini o'tkazib kelayotgan Dudakova esa ikkinchi raundda amerikalik Fatima Klaynga texnik nokaut bilan yutqazdi.

SHuningdek, bugungi turnirda Sezar Almeyda, Punaxili Soriano, Felipe Bunes, Marko Tulio va Jeykob Smit raqiblarini muddatidan oldin mag'lubiyatga uchratishdi.