UFC oktagonida yana bir superjangga guvoh bo'lamiz

Gap yarim engil vazn toifasida rossiyalik Movsar Evloev hamda amerikalik Aljameyn Sterling o'rtasidagi jang haqida ketmoqda. Ushbu superto'qnashuv 5 oktyabr kuni AQSHning Solt-Leyk-Siti shahrida tashkil etiladigan UFC 307 turniri doirasida bo'lib o'tadi. Hozircha UFC`ning o'zi rasman bu jangni elon qilgani yo'q. 

"UFC 307 turnirida men uning mag'lubiyatlar ustunidagi nol raqamini yo'qqa chiqaraman", - deya ushbu yangilikka munosabatini bildirgan Sterling. 

"Men nimalarga qodir ekanimni aynan shu jangda ko'rsataman. Yangi jamoa, to'liq kuch bilan bu jangga kiraman. Yarim engil vaznning eng kuchli jangchisi ekanimni isbotlayman", - dedi Evloev.

Sobiq UFC chempioni Aljameyn Sterling shu yilning aprel oyida yarim engil vazn toifasida debyut qilgandi. O'shanda u hakamlarning yakdil qarori bilan vatandoshi Kelvin Kattardan ustun kelgan edi. Mag'lubiyat nimaligini bilmay kelayotgan Movsar Evloev esa yanvar oyida britaniyalik Arnold Allendan ochkolar bo'yicha ustun kelgandi. Bu uning UFC promoushenidagi sakkizinchi g'alabasi edi. Ayni paytda rossiyalik reytingda beshinchi, amerikalik esa sakkizinchi o'rinni egallab turibdi.