UFC reytingi yangilandi. Ramazon Temirov va Bogdan Guskovning vaznlarida o'zgarishlar bor

Xabaringiz bor, Liganing ikkita vazn toifasida o'zbekistonlik aralash yakkakurash ustalari — Ramazon Temirov (57 kg) va Bogdan Guskov (93 kg) ham reytingdan o'rin olgan.

Yangilangan reytingda Temirovning divizionida 11-o'rindagi rossiyalik Tagir Ulanbekov bir pog'ona ko'tarildi, 10-o'rindagi amerikalik Tim Elliot esa aksincha, Tagir bilan joy almashdi. O'tgan haftada reytingga yangi qo'shilib, 15-pog'onaga joylashtirilgan Myanma vakili Joshua Van esa bu hafta 14-o'ringa ko'tarildi. 

Yaponiya sharafini himoya qiluvchi Kay Asakura ilk bor reytingga kiritildi va 15-o'rinda qayd etildi. Hamyurtimiz Ramazon Temirovning joyi o'zgarishsiz qoldi - 13-o'rin!

Yarimog'ir vazn toifasida esa Yan Blaxovichdan ustun kelgan amerikalik Karlos Ulberg uch pog'ona ko'tarilib, 3-o'ringa joylashdi. Polsha vakili esa ikki pog'ona pastlagan holda beshinchi o'rindan joy egalladi. Bu o'rindagi serbiyalik Aleksandr Rakich ham bir o'rin quyiga tushdi. Guskov ham Temirov singari 13-o'rinda o'zgarishsiz qoldi.