UFC sobiq chempion hamda davogar o'rtasidagi jangni tasdiqladi

Tashkilotchilar tomonidan ushbu oqshomning yana bir jangi tasdiqlandi. UFC kamariga sobiq davogar Marlon Vera UFC on ABC 7 turnirida divizionning sobiq chempioni Deyveson Figeredoga qarshi oktagonga chiqadigan bo'ldi. 

SHu yilning mart oyida Marlon Vera Mayamida o'tgan UFC 299 turnirida chempion SHon O’Melliga qarshi revansh jangida oktagonga chiqib, hakamlarning qaroriga ko'ra mag'lub bo'lgan edi.  

Deyveson Figeredo esa o'tgan yili ketma-ket ikkita g'alabaga erishdi. Yangi vaznga o'tgan Deyvesen avvaliga Rob Font, keyin esa Kodi Garbrendtni mag'lubiyatga uchratgandi. Ayni paytda Marlon Vera reytingda to'rtinchi, Deyveson Figeredo esa oltinchi o'rinni egallab turibdi. 

Eslatib o'tamiz, UFC on ABC 7 turnirining markaziy jangi Kori Sendxagen hamda Umar Nurmagomedov o'rtasida bo'lib o'tadi. Ushbu jang g'olibi chempionlik kamari uchun rasmiy davogarga aylanadi.