Umar Nurmagomedov 2024 yilning so'nggi UFC turnirida oktagonga chiqadi

U 2024 yil hisobidan o'rin olgan so'nggi UFC turnirida jang o'tkazadigan bo'ldi. Umar 14 dekabr kuni AQSHning Tampa shahrida o'tkaziladigan UFC on ESPN 63 turnirida divizion reytingining sakkizinchi pog'onasidan joy olgan xitoylik Song Yadongga qarshi oktagonga ko'tariladi. 

Vaziyatga yaqin manbalarning xabar berishicha, ushbu jang katta ehtimol bilan oqshomning markaziy to'qnashuvi bo'ladi. Mag'lubiyat nimaligini bilmay kelayotgan Umar Nurmagomedov shu yilning avgust oyida UFC ligasidagi oltinchi g'alabasini qo'lga kiritgandi. O'shanda u amerikalik Kori Sendxagenni ochkolar hisobiga ko'ra mag'lub etgan edi. 

Aslida rossiyalik jangchining keyingi raqibi divizion chempioni Merab Dvalishvili bo'lishi kerak edi. Lekin gruziyalik aralash yakkakurash ustasi 2025 yilning mart oyigacha oktagonga qaytmasligini aytganidan keyin Nurmagomedov rejasini o'zgartirishga majbur bo'ldi.

Song Yadong esa so'nggi jangini shu yilning mart oyida rossiyalik sobiq chempion Petr Yanga ochkolar hisobi bilan yutqazib qo'ygandi. Yangacha xitoylik sportchi ketma-ket ikkita g'alaba qayd etgandi. U avvaliga Riki Simonni texnik nokautga uchratdi, keyin esa hakamlarning yakdil qarori bilan Kris Gutierresni taslim etdi.