Umar Nurmagomedov kechagi kutilmagan nokautiga ilk bor izoh berdi

Rossiyalik aralash yakkakurash ustasi ahvoli haqida gapirdi hamda xatolarni tahlil qilib, oktagonga qaytishga vada berdi.

"Mening ahvolim yaxshi. Ko'ngil so'rab yozayotgan barchaga katta rahmat. Xatolarim ustida ishlayman va kuchli bo'lib qaytaman", — deb yozdi rossiyalik jangchi ijtimoiy tarmoqdagi sahifasida.

SHanxaydagi UFC Fight Night 286 turnirining markaziy jangida Yadong ko'pchilik kutmaganda nomdor raqibini ikkinchi raundda nokautga uchratdi. Nurmagomedov barcha uch hakamning baholash varaqalariga ko'ra birinchi raundni o'z foydasiga hal qilgan edi. Hal qiluvchi vaziyatdan biroz oldin esa, boshlar to'qnashuvi natijasida Songning o'ng ko'zi ustida jiddiy jarohat (kesilish) yuzaga kelib, yuzi qonga belangandi.

Nurmagomedov shu paytgacha faoliyatida hech qachon muddatidan oldin mag'lub bo'lmagandi. Uning faoliyatidagi yagona mag'lubiyati o'tgan yilning boshida Merab Dvalishviliga qarshi chempionlik jangida qayd etilgan va o'shanda u hakamlarning bahsli qarori bilan yutqazgandi.

Ketma-ket ikkinchi marta muddatidan oldin g'alaba qozongan xitoylik jangdan so'ng o'zining navbatdagi raqibi sifatida Dvalishvili va Petr Yan o'rtasidagi chempionlik jangi g'olibini ko'rishni istashini aytdi. Ushbu principial trilogiya 24 oktyabr kuni Abu-Dabida bo'lib o'tadigan UFC 333 turnirida yakuniga etadi.