Urganch tumani yosh merganlari Viloyat kubogi sohibi + FOTO

Viloyat texnik va amaliy sport turlari markazi tomonidan “Men g'olib!” shiori ostida o'tkazilgan mazkur musobaqada vohaning shahar va tumanlaridan tashrif buyurgan 18 ta jamoaning 70 nafarga yaqin sportchisi g'oliblik yo'lida merganlik mahoratini namoyish etishdi.

Sarhisoblarga ko'ra, Kubok bahslarining to'rt bosqichi yakuni bo'yicha pnevmatik miltiqdan o'q otish birinchiligida Bog'ot  tumani o'quv sport texnika klubi azosi Nilufar Yo'ldosheva qizlar orasida, Urganch tumani O'STK sportchisi Temurbek Abdullaev o'g'il bolalar o'rtasida shohsupaning eng yuqori pog'onasiga ko'tarilishga muvaffaq bo'lishdi.

Pnevmatik to'pponchadan o'q otish musobaqasida Urganch tumani vakillari Risolat Qurbonova va SHohruxxon Yusufov mos ravishda birinchi o'rindan joy olishdi.

SHuningdek, Xorazm viloyat texnik va amaliy sport turlari markazidan Diyorbek Ochilov, SHovot tumanidan Sevara Abdullaeva, SHukurjon Odamboeva, Bekzod Komilov, Xiva tumanidan Laylo Rahimova, Xolbek Ollayorov, Bog'ot tumanidan Laylo Sultonova, Qo'shko'pir tumanidan SHahzod Saparboev va “Karvon” o'quv sport texnika klubidan Og'abek Mahmudov sovrindor bo'lishdi.

Joriy yilgi Xorazm viloyati kubogining g'olib va sovrindorlarini viloyat texnik va amaliy sport turlari markazi direktori Odilbek Ibragimov qutlab, barchasini medal, diplom va sovg'alar bilan taqdirladi.

Umumjamoa hisobida esa 2021 yilgi Xorazm viloyati kubogi Urganch tumani O'STK merganlariga topshirildi.

Ikrom XUDOYBERGANOV, Xiva tumanidan