US Open 2026. Kamilla Rahimova 1/16 finalda. Endigi raqiba dunyoning 1-raketkasi!

O'zbekistonning ikkinchi raketkasi Kamilla Rahimova 1/64 final uchrashuvida turnirda 27-raqam ostida tasniflangan chexiyalik Barbora Kreychikovani 7/6(4), 6/2 hisobida mag'lubiyatga uchratgan edi. Bugun o'tkazilgan 1/32 final uchrashuvida esa yana bir ajoyib g'alaba qo'lga kiritildi. 

Oltmish besh daqiqa davom etgan bahsda Rahimova ispaniyalik Oksana Selexmetevani ortiqcha qiyinchiliksiz taslim etdi - 6/3, 6/0. Hamyurtimiz bitta eys zarbasini amalga oshirdi. Qo'shxatoga yo'l qo'ymadi. Oksanada bitta qo'shxato bo'ldi, lekin eys zarbasini ijro eta olmadi. Tennischilarning o'zaro oltinchi uchrashuviga kelib Rahimova muvozanatni tikladi - 3:3. 

Taqqoslash uchun, Kamilla Rahimova ayni paytda WTA reytingida 92, Oksana Selexmeteva esa 93-o'rinni egallab turibdi. Kamillaning 1/16 finaldagi raqibasi dunyoning birinchi raketkasi Arina Sobolenko bo'ladi. Belaruslik tennis malikasi ikkinchi davrada reytingning 160-pog'onasida borayotgan rossiyalik Polina Yatchenkoni 6/1, 6/1 hisobida dog'da qoldirdi. 

Kamilla Rahimova - Arina Sobolenko uchrashuvi ertaga, 4 sentyabr kuni bizning vaqt bilan soat 20:00da boshlanadi. Bu tennischilarning o'zaro o'tkazadigan to'rtinchi uchrashuvi bo'ladi. Bugungacha o'tgan uchchala bahsda ham Soblenkoning qo'li baland kelgan.