"Uzchess Cup". Bizni 5-turda qaynoq partiyalar kutmoqda. Peshqadam shaxmatchilarimiz kimlarga qarshi dona surishadi?

Mukofot jamg'armasi 166 000 AQSH dollarini tashkil etuvchi musobaqada bugun 5-tur uchrashuvlari o'tkaziladi. Turnirning "Masters" va "Futures" guruhlarida o'zbekistonlik shaxmatchilar yakka peshqadam bo'lib turishibdi. 

Bugun istedodli grossmeysterimiz Nodirbek Yakubboev (2634) qora donalarda ozarbayjonlik SHaxriyar Mamedyarov (2734)ga qarshi bahs olib boradi. Nodirbek Abdusattorov oq donalarda Aleksandr Grishukni sinovdan o'tkazadi. Kecha Abdusattorovni mag'lub etgan Javohir Sindarov esa qora donalarda Eronning birinchi raqamli shaxmatchisi, "Uzchess Cup" turnirida uchinchi raqam ostida tasniflangan Parham Maqsudlu bilan hisob-kitob qiladi. 

"Uzchess Cup". "Masters" guruhi. 5-tur

Richard Rapport (Ruminiya, 2715) - Aleksey Sarana (Serbiya, 2712)

Vidit Santosh Gujrathi (Hindiston, 2721) - YU Yang Yi (Xitoy, 2715)

Nodirbek Abdusattorov (O'zbekiston, 2766) - Aleksandr Grishuk (FIDE, 2719)

Parham Maqsudlu (Eron, 2733) - Javohir Sindarov (O'zbekiston, 2668)

SHaxriyar Mamedyarov (Ozarbayjon, 2734) - Nodirbek Yakubboev (O'zbekiston, 2634)

"Challengers" guruhi peshqadami, serbiyalik Aleksandar Indjich 5-turda qora donalarda hindistonlik Abhijit Gupta bilan to'qnash keladi. Ikkinchi o'rinni egallab turgan shaxmatchimiz SHamsiddin Vohidov bu turda oq donalarda turkiyalik Aydin Suleymanliga qarshi bahs olib boradi. Uchinchi pog'onadagi Jahongir Vohidov germaniyalik Aleksandr Predke bilan uchrashadi. 

"Futures" guruhida 4-turdan so'ng o'zbekistonlik uch nafar shaxmatchi kuchli uchlikdan joy olib turibdi. Ketma-ket uchinchi g'alabasini qo'lga kiritgan Muhammadzohid Suyarov (2430) 3,5 ochko bilan yakka peshqadamlikni qo'lga olgan. U bugun 5-turda qora donalarda ukrainalik Vitaliy Bernardski bilan hisob-kitob qiladi. Kuchli uchlikdan joy olgan Muhiddin Madaminov ozarbayjonlik Vugar Rasulovga, Saidakbar Saydaliev esa yana bir hamyurtimiz Humoyun Begmuratovga qarshi bahs olib boradi.