UzChess Cup III. Madaminovda to'rtinchi g'alaba, uch o'zbek yigiti Top-3`talikda!

Uchinchi bor tashkil etilayotgan UzChess Cup III musobaqasi “Masters”, “Challengers” va “Futures” guruhlarida o'tkazilmoqda. Bosh sovrin uchun dunyoning ko'zga ko'ringan grossmeysterlari bahs olib boryapti. 

To'qqiz turdan iborat klassik shaxmat musobaqasining kashfiyotiga aylangan Muhiddin Madaminov ketma-ket ikkinchi, musobaqadagi to'rtinchi g'alabasini qo'lga kiritdi. Bu safar u hindistonlik grossmeyster Vidit Santosh Gujrathini taslim eta oldi. “Masters” guruhidagi qolgan uch grossmeysterimiz 6-turda raqiblari bilan durang o'ynashdi. 

SHamsiddin Vohidov o'zbek derbisida Nodirbek Yakubboev bilan murosaga keldi. Nodirbek Abdusattorov qora donalarda amerikalik Hans Mok Niemann bilan ochkolarni bo'lishib oldi. Rossiyalik Yan Nepomnyashiy omadsizliklardan keyin nihoyat bu turda hindistonlik Arjun Erigaisini mag'lubiyatga uchratdi. Greciyalik Nikolas Teodoru blic bo'yicha jahon chempioni ozarbayjonlik SHaxriyar Mamedyarovga yutqazib qo'ydi.  

Oltinchi turdan keyin turnir jadvalida SHamsiddin Vohidov va Muhiddin Madaminov 4 ochkodan jamg'arib, qo'shhokim bo'lib olishdi. Nodirbek Abdusattorov 3,5 ochko bilan sof uchinchi o'rinni band etgan. Arjun Erigaisi, Hans Niemann, SHaxriyar Mamedyarov, Yan Nepomnyashiy, Nodirbek Yakubboev hisobida 3 ochkodan bor. Nikolas Teodoru 2 ochko bilan 9-pog'onadan joy olgan bo'lsa, Vidit Santosh 1,5 ochko jamg'argan holda so'nggi o'rinni band etgan. 

Bugun 7-turda bizni ajoyib o'zbek derbisi kutib turibdi - Nodirbek Abdusattorov Javohir Sindarovning sekundant-murabbiyi Muhiddin Madaminovga qarshi! SHamsiddin Vohidov qora donalarda SHaxriyar Mamedyarov bilan o'ynasa, Nodirbek Yakubboev oq donalarda Yan Nepomnyashiyga qarshi bahs olib boradi. 

Malumot uchun, "Masters" turniri chempioni 20 000, “Challengers” guruhi g'olibi 6 000, “Futures”da bosh sovringa ega chiqqan shaxmatchi esa 4 000 AQSH dollari miqdorida mukofot pulini qo'lga kiritadi. "Masters" turnirida ikkinchi o'rin egasi 15 000, sovrinli uchinchi pog'onadan joy olgan shaxmatchi 10 000 dollar bilan taqdirlanadi.