UzChess Cup III. Qoyil! Madaminov Mamedyarovni, Vohidov Nepomnyashiyni mag'lub etdi. SHamsiddin yakka peshqadam!

Uchinchi bor tashkil etilayotgan UzChess Cup III musobaqasi “Masters”, “Challengers” va “Futures” guruhlarida o'tkazilmoqda. Bosh sovrin uchun dunyoning ko'zga ko'ringan grossmeysterlari bahs olib boryapti. 

To'qqiz turdan iborat klassik shaxmat musobaqasining dastlabki ikki turida nomdor raqiblarini mag'lub etib, katta shov-shuv ko'targan Muhiddin Madaminov ketma-ket ikkita mag'lubiyat qabul qilib olgandi. Beshinchi turda Sindarovning sekundanti bo'lgan Muhiddin yana muhim va shov-shuvli g'alabani tantana qildi. U qora donalarda o'ynaganiga qaramay, ozarbayjonlik taniqli grossmeyster SHaxriyar Mamedyarovni taslim etdi. 

Yana bir grossmeyterimiz SHamsiddin Vohidov ham sensaciya muallifiga aylandi. U blic bo'yicha jahon chempioni, rossiyalik mashhur shaxmatchi Yan Nepomnyashiyni mag'lub etishni uddaladi. SHamsiddin o'tgan yili ham Yandan ustun kelgan edi.   

Beshinchi turning qolgan uchta partiyasida kuchlar teng keldi. Nodirbek Abdusattorov hindistonlik Arjun Erigaisi, Nodirbek Yakubboev greciyalik Nikolas Teodoru, hindistonlik yana bir grossmeyster Vidit Santosh Gujrathi amerikalik Hans Mok Niemann bilan murosaga keldi. 

Beshinchi turdan keyin SHamsiddin Vohidov 3,5 ochko bilan turnir jadvalida yakka peshqadamga aylanib oldi. Arjun Ergaisi, Nodirbek Abdusattorov va Muhiddin Madaminov hisobida 3 ochkodan bor. Nodirbek Yakubboev va Hans Niemann 2,5 ochkodan jamg'arib, mos ravishda beshinchi hamda oltinchi o'rinni band etgan. Nikolas Teodoru, Yan Nepomnyashiy va SHaxriyar Mamedyarov 2 ochko bilan keyingi o'rinlarda bormoqda. Vidit Santosh 1,5 ochko jamg'argan holda so'nggi o'rinda qoldi. 

Bugun 6-turda SHamsiddin Vohidov oq donalarda Nodirbek Yakubboevga, Nodirbek Abdusattorov qora donalarda Hans Niemannga, Muhiddin Madaminov oq donalarda Vidit Santoshga qarshi bahs olib boradi. Oltinchi turda, shuningdek, Yan Nepomnyashiy - Arjun Ergaisi hamda Nikolas Teodoru - SHaxriyar Mamedyarov uchrashuvlari ham o'tkaziladi.