UzChess Cup III. SHov-shuv ko'targan Madaminovda ketma-ket ikkinchi mag'lubiyat, Vohidov peshqadam!

Uchinchi bor tashkil etilayotgan UzChess Cup III musobaqasi “Masters”, “Challengers” va “Futures” guruhlarida o'tkazilmoqda. Bosh sovrin uchun dunyoning ko'zga ko'ringan grossmeysterlari bahs olib boryapti. 

To'qqiz turdan iborat klassik shaxmat musobaqasining dastlabki ikki turida nomdor raqiblarini mag'lub etib, katta shov-shuv ko'targan Muhiddin Madaminov ketma-ket ikkinchi mag'lubiyatini qabul qilib oldi. 3-turda yana bir grossmeyterimiz SHamsiddin Vohidovga yutqazgan Madaminov 4-turda Nodirbek Yakubboevga ham yutqazdi. 

Nodirbek Abdusattorov muqarrar mag'lubiyatga kelib qolgan partiyani qutqarib qoldi, u rossiyalik Yan Nepomnyashiy bilan durangga erisha oldi. Qatorasiga ikkinchi g'alabasini qo'lga kiritgan SHamsiddin Vohidov qo'shimcha ko'rsatkichlarga ko'ra peshqadamga aylandi. U qora donalarda o'ynaganiga qaramay, greciyalik grossmeyster Nikolas Teodoruni mag'lubiyatga uchratdi. 

Blic bo'yicha jahon chempioni, bir paytlar dunyo reytingida ikkinchi o'rinni egallagan ozarbayjonlik SHaxriyar Mamedyarov qora donalarda amerikalik Hans Mok Niemann bilan murosaga keldi. Hindistonlik Vidit Santosh Gujrathi ham qora donalarda vatandoshi Arjun Ergaisi bilan durang o'ynadi. 

To'rtinchi turdan keyin Muhiddin Madaminov 1-o'rindan 6-pog'onaga tushib ketdi. SHamsiddin Vohidov 2,5 ochko bilan birinchi o'ringa ko'tarilib oldi. Arjun Erigaisi va Nodirbek Abdusattorov hisobida ham 2,5 ochko bor. Ular mos ravishda ikkinchi va uchinchi o'rinni band etishgan. Nodirbek Yakubboev, Hans Niemann, Muhiddin Madaminov, SHaxriyar Mamedyarov va Yan Nepomnyashiy hisobida 2 ochkodan bor. Nikolas Teodoru 1,5 ochko bilan 9-pog'onadan joy olgan bo'lsa, Vidit Santosh 1 ochko jamg'argan holda so'nggi o'rinni band etgan. 

Bugun 5-turda SHamsiddin Vohidov oq donalarda Yan Nepomnyashiy sinovidan o'tadi. Nodirbek Abdusattorov oq donalarda Ardun Erigaisiga qarshi bahs olib boradi.  Muhiddin Madaminov qora donalarda SHaxriyar Mamedyarov, Nodirbek Yakubboev Nikolas Teodoru bilan hisob-kitob qiladi.