UzChess Cup III. Vohidov Madaminovni to'xtatdi. Abdusattorov hind grossmeysterini sinovdan o'tkazdi

Uchinchi bor tashkil etilayotgan UzChess Cup III musobaqasi “Masters”, “Challengers” va “Futures” guruhlarida o'tkazilmoqda. Bosh sovrin uchun dunyoning ko'zga ko'ringan grossmeysterlari bahs olib boryapti. 

To'qqiz turdan iborat klassik shaxmat musobaqasining dastlabki ikki turida nomdor raqiblarini mag'lub etib, katta shov-shuv ko'targan Muhiddin Madaminov 3-turda yana bir grossmeyterimiz SHamsiddin Vohidov bilan hisob-kitob qildi. Qora donalarda o'ynagan Muhiddin bu uchrashuvda mag'lubiyatga uchradi, lekin qo'shimcha ko'rsatkichlarga ko'ra turnir jadvalidagi peshqadamligini saqlab qoldi.  

Nodirbek Abdusattorov 2-turda ozarbayjonlik taniqli shaxmatchi, blic bo'yicha jahon chempioni, bir paytlar dunyo reytingida ikkinchi o'rinni egallagan SHaxriyar Mamedyarovni mag'lubiyatga uchratgandi. Kecha Abdusattorov qora donalarda hindistonlik Vidit Santosh Gujrathi bilan murosaga keldi. 

Nodirbek Yakubboev oq donalarda amerikalik Hans Mok Niemann bilan durang qayd etdi. Qolgan partiyalarda ham tomonlar durangga imzo chekishdi. Hindistonlik Arjun Ergaisi SHaxriyar Mamedyarov bilan, Nikolas Teodoru Yan Nepomnyashiy bilan ochkolarni bo'lishib oldi. 

Uchinchi turdan keyin Muhiddin Madaminov 2 ochko bilan qo'shimcha ko'rsatkichlarga ko'ra peshqadamligini davom ettirmoqda. Nodirbek Abdusattorov va Arjun Ergaisi hisobida ham 2 ochkodan bor, ular kuchli uchlikni yakunba berishgan. Nikolas Teodoru, Hans Niemann, Yan Nepomnyashiy, SHamsiddin Vohidov, SHaxriyar Mamedyarov hisobida 1,5 ochkodan bor. Nodirbek Yakubboev 1 ochko bilan 9-pog'onadan joy olgan bo'lsa, Vidit Santosh 0,5 ochko jamg'argan holda so'nggi o'rinni band etgan. 

Bugun 4-turda Muhiddin Madaminov oq donalarda yana bir hamyurtimiz Nodirbek Yakubboevga qarshi bahs olib boradi. Nodirbek Abdusattorov qora donalarda rossiyalik Yan Nepomnyashiy bilan hisob-kitob qiladi. SHamsiddin Vohidovni qora donalarda greciyalik Nikolas Teodoruga qarshi uchrashuv kutmoqda. 

Malumot uchun, "Masters" turniri chempioni 20 000, “Challengers” guruhi g'olibi 6 000, “Futures”da bosh sovringa ega chiqqan shaxmatchi esa 4 000 AQSH dollari miqdorida mukofot pulini qo'lga kiritadi. "Masters" turnirida ikkinchi o'rin egasi 15 000, sovrinli uchinchi pog'onadan joy olgan shaxmatchi 10 000 dollar bilan taqdirlanadi.