"Uzchess Cup". Nodirbeklar qo'shhokim, derbida durang, Suyarovda ilk mag'lubiyat, SHamsiddin peshqadamni taslim etdi

Mukofot jamg'armasi 166 000 AQSH dollarini tashkil etuvchi musobaqada 7-tur uchrashuvlari ortda qoldi. Quvonarlisi, aynan ushbu turdan keyin turnirning uchchala guruhi - "Masters", "Challengers" va "Futures"da o'zbekistonlik shaxmatchilar peshqadamlikni o'z qo'llariga olishdi. SHu kungacha "Masters" va "Futures"da hamyurtlarimiz karvonboshilik qilishayotgandi. 

Kecha "Challengers" guruhining markaziy uchrashuvida SHamsiddin Vohidov shu kungacha peshqadam bo'lib kelgan serbiyalik Aleksandar Indjichni mag'lubiyatga uchratdi va 5 ochko bilan 1-o'ringa ko'tarilib oldi. Serbiyaliklar Indjich va Aleksandr Predke hisobida 4,5 tadan ochko bor va ular kuchli uchlikka yakun yasashgan. Bu turda Jahongir Vohidov qora donalarda o'ynashiga qaramay, germaniyalik Aleksandr Donchenkoni engishga muvaffaq bo'ldi. 

Kuchlilar jam bo'lgan "Masters" guruhining 7-turida ham o'zbek derbisi kuzatildi va juda tez yakunlandi. Istedodli grossmeysterlarimiz Nodirbek Yakubboev va Javohir Sindarov o'zaro uchrashuvda durangga imzo chekishdi. Nodirbek Abdusattorov ketma-ket ikki g'alabadan keyin bu turda murosaga keldi. U oq donalarda ruminiyalik Richard Rappord bilan durang qayd etdi. O'tgan turda Abdusattorovga yutqazgan xitoylik YU Yang Yi bor alamini eronlik Parham Maqsudludan oldi. 

Sakkizinchi tur oldidan "Masters" guruhida qo'shhokimlik saqlanib qoldi. Nodirbek Yakubboev va Nodirbek Abdusattorov 4,5 ochkodan jamg'arib, turnir jadvalida peshqadamlik qilishyapti. Javohir Sindarov 4 ochko bilan kuchli uchlikka yakun yasagan. YU Yang Yi ham kechagi g'alabada keyin ochkolarini 4 taga etkazib oldi. Richard Rappord va Aleksey Sarana hisobida 3,5 tadan ochko bor. 

"Futures" guruhining 7-turida Muhammadzohid Suyarov (2430) ilk mag'lubiyatini qabul qilib oldi. Ketma-ket to'rtta g'alabadan keyin turnir jadvalida yakka peshqadam bo'lib olgan yosh Muhammadzohid bu turda qora donalarda ozarbayjonlik Vugar Rasulovga yutqazib qo'ydi. SHunga qaramay, Suyarov 5 ochko bilan peshqadamligini saqlab qoldi. Rasulov kechagi g'alabasi evaziga 4,5 ochko bilan 2-o'ringa ko'tarilib oldi. Hamyurtlarimiz Muhiddin Madaminov va Saidakbar Saydaliev hisobida ham 4,5 ochkodan bor.