"Uzchess Cup" turnirining 2-turiga oida barcha malumotlar bitta xabarda

Mukofot jamg'armasi 166 000 AQSH dollarini tashkil etuvchi musobaqa Samarqand mezbonlik qilgan jahon chempionatini inobatga olmaganda, yurtimizda o'tkazilayotgan eng katta masshtabdagi turnir hisoblanadi. 

Turnir 3 guruhda o'tkazilmoqda:

"Masters" guruhida reytingi 2700 va undan yuqori shaxmatchilar;

"CHellenjers" guruhida reytingi 2600 va undan yuqori shaxmatchilar;

"Fyuchers" guruhida reytingi 2500 va undan yuqori shaxmatchilar ishtirok etishadi.

Kecha "Uzchess Cup" turnirida 2-tur uchrashuvlari bo'lib o'tdi. Dunyoning nomdor grossmeysterlari jam bo'lgan "Masters" guruhida hamyurtlarimizdan Nodirbek Abdusattorov, Javohir Sindarov va Nodirbek Yakubboev bosh sovrin uchun bahs olib boryapti. Abdusattorov bu turda qora donalarda ozarbayjonlik asosiy raqiblaridan biri SHahriyar Mamedyarov bilan durangga imzo chekdi. 

Nodirbek Yakubboev hindistonlik Vidit Santosh Gujrathini mag'lub etishni uddaladi. Birinchi turda Abdusattorovga yutqazgan Parham Maqsudlu (Eron) serbiyalik Aleksey Saradan ustun keldi. Javohir Sindarov ruminiyalik Richard Rapport bilan durang o'ynadi. 

"Masters" guruhining 2-turidan so'ng Nodirbek Abdusattorov va Nodirbek Yakubboev 1,5 ochkodan jamg'arib, turnir jadvalida qo'shhokimlik qilishyapti. Rapport, Maqsudlu, Mamedyarov, Sindarov, Yang Yi, Sarana hisobida 1 ochkodan bor. 

"Challengers" guruhida shaxmatchilarimizdan SHamsiddin Vohidov germaniyalik Aleksandr Predkeni mag'lub etishga muvaffaq bo'ldi. Jahongir Vohidov esa Aydin Suleymanliga imkoniyatni boy berib qo'ydi. Ikkinchi g'alabasini qo'lga kiritgan serbiyalik Aleksandar Indich bu guruhda yuz foizlik ko'rsatkich bilan yakka peshqadam bo'lib oldi. SHamsiddin Vohidov 1,5 ochko bilan sof ikkinchi o'rinni band etgan. Jahongir Vohidov 1 ochko bilan qo'shimcha ko'rsatkichlarga ko'ra kuchli uchlikka yakun yasab turibdi.   

"Futures" guruhida o'zbekistonlik shaxmatchilardan Saidakbar Saydaliev hamda Muhammadzoxid Suyarov 1,5 ochkodan jamg'arib, birinchi va ikkinchi o'rinlarni egallab turishibdi. Eronlik Bardiya Daneshvarda ham 1,5 ochko bor. Muhiddin Madaminov 1 ochko bilan 6-pog'onadan joy olgan. Yosh Humoyun Begmuratov hisobida ham 1 ochko bor. Kecha o'tgan 2-turda Suyarov qora donalarda o'ynashiga qaramay, Mixail Nikitenkoni engdi. Madaminov Sergey Tivyakov bilan murosaga keldi. Humoyun Vitaliy Sivuk bilan durang o'ynadi. Saydaliev esa ukrainalik Vitaliy Bernardskini mag'lub eta oldi. 

Vaqt nazorati: Klassik. Har bir o'yin boshida o'yinchilarga 40 ta yurish uchun 90 daqiqa, 41-yurishdan o'yin oxirigacha esa qo'shimcha 30 daqiqa beriladi va har bir yurish uchun 30 soniya vaqt qo'shib boriladi.