"Uzchess Cup". Uchchala guruhda o'zbek shaxmatchilarining peshqadamligi davom etmoqda (8-turning barcha malumotlari)

Mukofot jamg'armasi 166 000 AQSH dollarini tashkil etuvchi musobaqada 8-tur uchrashuvlari ortda qoldi. Bu turdan keyin ham turnirning uchchala guruhi - "Masters", "Challengers" va "Futures"da o'zbekistonlik shaxmatchilar o'z peshqadamliklarini saqlab qolishdi. Faqat so'nggi tur oldidan vaziyat birmuncha murakkablashdi.  

Kuchlilar jam bo'lgan "Masters" guruhining 8-turida uchchala grossmeysterimiz ham qora donalarda o'ynadi. Istedodli shaxmatchimiz Nodirbek Yakubboev (2634) Aleksandr Grishuk (FIDE, 2719) bilan murosaga keldi. Nodirbek Abdusattorov (2766) ketma-ket ikkinchi uchrashuvida ham durangga rozi bo'ldi. U bu safar hindistonlik Vidit Santosh Gujrathi (2721) bilan ochkolarni bo'lishib oldi. Javohir Sindarov (2668) esa Aleksey Sarana (Serbiya, 2712)ga imkoniyatni boy berib qo'ydi. 

So'nggi to'qqizinchi tur oldidan "Masters" guruhida qo'shhokimlik saqlanib qoldi. Nodirbek Yakubboev va Nodirbek Abdusattorov 5 ochkodan jamg'arib, turnir jadvalida peshqadamlik qilishyapti. Xitoylik YU Yang Yi va Aleksey Sarana 4,5 tadan ochko to'plab, 3-4 o'rinlarni band etishgan. Javohir Sindarov kechagi mag'lubiyatdan keyin 4 ochko bilan 5-o'ringa tushib ketdi. Richard Rapportda ham 4 ochko bor. 

"Challengers" guruhining 8-turida peshqadam SHamsiddin Vohidov qora donalarda yana bir hamyurtimiz Jahongir Vohidov bilan to'qnash keldi. O'zbek derbisida tomonlar durangga rozi bo'lishdi. Ettinchi turgacha peshqadam bo'lib kelgan Aleksandar Indjich esa ketma-ket ikkinchi mag'lubiyatini qabul qilib oldi. Avval SHamsiddin Vohidovga yutqazgan serbiyalik grossmeyster kecha oq donalarda o'ynaganiga qaramay, Evgeniy Romanovga imkoniyatni boy berdi. Yana bir serbiyalik shaxmatchi Aleksandr Predke esa aksincha, bu turda turkiyalik Aydin Suleymanlini engib, ochkolarini 5,5 taga etkazib oldi. Turnir jadvalida SHamsiddin Vohidov va Predke 5,5 ochko bilan qo'shhokimlik qilishyapti. 

"Futures" guruhining 8-turida Muhammadzohid Suyarov (2430) oq donalarda jamoadoshi Humoyun Begmuratovni mag'lub eta olmadi. Uchrashuvda durang natija qayd etildi. SHunga qaramay, yosh Muhammadzohid 5,5 ochko bilan qo'shimcha koeficentlarga ko'ra 1-o'rinni o'zida saqlab qoldi. Lekin shveciyalik Vitaliy Sivuk va eronlik Bardiya Daneshvar bu turda g'alaba qozonib, o'z ochkolarini 5,5 taga etkazib olishdi. Hamyurtlarimiz Muhiddin Madaminov va Saidakbar Saydaliev hisobida ham 4,5 ochkodan bor. Afsuski, ularning har ikkisi ham 8-turda mag'lubiyat alamini totib ko'rishdi.