Vadim Epanchincev: Toshkentda yaxshi muz saroyi borligini eshitgandim, bu erga kelib shunga amin bo'ldim

"O'yin yaxshi bo'ldi. Bu biz uchun mavsumdagi uchinchi safar o'yini. Ko'rsatmalarni to'g'ri bajargan jamoamga rahmat. Darvozabonimiz yaxshi harakat qildi. Ammo, ko'pchilik keraksiz vaziyatda chetlatildi, ayniqsa o'yin oxirida. Bu bizning nuqsonimiz. O'ylaymanki, bu narsa joyiga tushib ketadi", - deb so'z boshladi murabbiy.

-O'yinda ikki etakchingiz ishtirok etmadi. Berlyov nima uchun bahsda o'ynamadi? Ikkinchi savolim, "Humo" gol kiritgan vaziyatda tanaffus oldingiz. Nima uchun?

-Berlyov oilaviy sabablarga ko'ra bugun o'ynamadi, u ikkita safar o'yinimizda qatnashgandi. U farzandli bo'ldi va shuning uchun uyiga jo'nab ketdi. Olingan tanaffus haqida gapiradigan bo'lsam, buni raqib tempini tushirish uchun kerak deb hisobladik. 

-O'zbekistonga xush kelibsiz. "Humo" ilk marotaba VXLda qatnashmoqda. "Humo Arena", Toshkent shahri haqida fikringiz qanday?

-SHaxsan men ilk marotaba bu erga tashrif buyurdim. Avval Toshkentda yaxshi muz saroyi borligi haqida eshitgandim. Bugun shunga amin bo'ldim, yigitlar uchun bu erda xokkey o'ynash juda qulay.