Vadim Menkov: “O'n uchinchi oltinni qo'lga kiritdim? O'n uch raqami men uchun qadrli”

Ikki karra jahon chempioni, bir necha karra Osiyo chempioni Vadim Menkov o'zbekistonlik sportchilar orasida birinchi bo'lib 4ta Osiyo o'yinlarida g'oliblik shoxsupasiga ko'tarildi. O'n olti yil davomida Osiyo qitasida 1000 metr masofada eng yaxshi kanoechi nomini saqlab turish oson ish emas, albatta. 

Bugungi finalda qo'lga kiritilgan g'alaba esa osonlikcha kelgani yo'q. Vadim marraga etib kelgan zahoti unga shifokorlar tez yordam ko'rsatishdi. Uning qon bosimi 190ga ko'tarilib ketgandi. Unga suniy kislorod berishdi. 

Ko'ryapsizmi, bitta medalni qo'lga kiritish qanchalik mashaqqatli mehnat va sog'liqdan kechishni talab qiladi.  

Biz taqdirlash marosimidan so'ng Vadim Menkovdan intervyu oldik. 

- Medallar uchun kurash murosasiz va keskin ruhda o'tishini bilardim, - deya so'z boshladi V.Menkov. - Bizda saralash bahslari o'tkazilmadi. Qitaning eng kuchli kanoechilari Palembangga etib kelishgan edi. SHu boisdan ham bu startga alohida tayyorgarlik ko'rgandim. G'alaba qozonsam, 4ta Osiyo o'yinlarida chempionlikka erishgan yagona sportchiga aylanishimni bilardim. Murakkab vazifani uddalaganimdan juda ham xursandman. Ushbu g'alabani oila azolarim, murabbiylarim, O'zbekiston xalqi va Prezidentimizga tuhfa qildim. Mustaqilligimizning 27 yillik bayramiga munosib sovg'a hozirladik, deb o'ylayman.  

- Finishga yaqin qolganida asosiy raqibingiz hisoblangan xitoylik sportchining qayig'i kutilmaganda ag'darilib ketdi. Vaholanki, u masofaning katta qismida peshqadamlik qilayotgandi. Bu holat sizga yordam berib yubordimi?

- Bilasizmi, bizning sportda bunday holatlar bo'lib turadi. Qayiqni katta tezlikda boshqarish va shuning barobarida muvozanatni saqlab turish kerak. Bir zumga xushyorlikni yo'qotsangiz, mana shunday noxush holatlarga tushib qolasiz. Marraga yaqin qolgan bir pallada xitoylik raqibim bilan deyarli yonm-yon kelayotgandik. U menga bir qaradiyu muvozanatni yo'qotib, qayig'i bilan ag'darilib ketdi. Yiqilmagan taqdirda ham mendan o'zib keta olmasdi, nazarimda. CHunki, uning deyarli kuchi qolmagandi. 

- Siz terma jamoamizga ushbu Osiyo o'yinlaridagi 13-oltin medalni taqdim etdingiz...

- Bundan juda ham xursandman. O'zi hayotimda 13 raqami bilan bog'liq qiziqarli holatlar bor. O'zim 13 fevral kuni dunyoga kelganman. Tug'ilganimda uydagilar 13 omadsiz raqam, uning tug'ilgan kunini 12 fevral deb yozdirish kerak, deyishgan ekan. Lekin o'sha paytda onam bunga unamagan ekanlar. O'ylab qarasam, juda to'g'ri yo'l tutgan ekanlar. Keyin katta musobaqalardagi oltin medallarim soni ham 13taga etdi. Osiyo o'yinlaridagi medallarimiz esa yanada ko'payishini istayman.

Kamoliddin ALIMOV suhbatlashdi 

(Palembang, Indoneziya) Surat mualifi - Abdullo Fayzullaev