Vohiddin Najmiddinov jahon chempionati sovrindori, O'zbekiston umumjamoa hisobida ikkinchi bo'ldi + FOTO

Yoshlar, kattalar va faxriylar o'rtasida tashkil etilgan jahon chempionatida Vohiddin Najmiddinov boshchiligidagi O'zbekiston terma jamoasi ham munosib tarzda ishtirok etdi.  

Xabar berganimizdek, yoshlar o'rtasidagi musobaqada Javohir Qurbonov professional yo'nalishda oltin medalga sazovor bo'ldi. U 24 kilolik toshni 10 daqiqa ichida dast ko'tarish mashqida 170 marta, siltab ko'tarishda 93 bor, ikkikurashda 263 marotaba ko'tarishga muvaffaq bo'ldi. 

SHuningdek, Javohir uzun ciklda kumush medalni qo'lga kiritdi. -68 kg vazn toifasida Asadbek O'zgamov uzun ciklda eng yaxshi natija ko'rsatdi va oltin medal bilan taqdirlandi. Ikkikurashda esa O'zgamov bronza medaliga sazovor bo'ldi.

SHu tariqa bahodirlar o'yinlari va tosh ko'tarish bo'yicha yoshlar o'rtasidagi jahon chempionatida O'zbekiston terma jamoasi umumjamoa hisobida 90 ball bilan 2-o'rinni qo'lga kiritdi. Norasmiy umumjamoa hisobida musobaqa mezboni – Rossiya terma jamoasi 110 ball bilan 1-o'ringa sazovor bo'ldi. Kuchli uchlikni 70 ball bilan Latviya terma jamoasi yakunlab berdi.

Jahon chempionatining so'nggi kuni faxriylar supachaga chiqishdi. -68 kg vaznda yurtimiz sharafini himoya qilgan Vohiddin Najmiddinov ikki kurashda 24 kilogramlik toshni 63  marotaba ko'tarib, bronza medaliga sazovor bo'ldi. Terma jamoamiz delegaciyasi ertaga soat 08:30da Toshkentga qaytib keladi.